Тӑван çӗршывшăн служить тума каяççӗ

023 ҫулхи октябрӗн 16-мӗшӗнче кӑҫалхи кӗрхи призывпа çар службине каччăсене пӗрремӗш хут ӑсатрӗҫ. Мероприяти Петр Дементьев ячӗллӗ паркра иртрӗ.
Йӑла тӑрӑх, Хусана пуху пунктне каяс умӗн каччăсене районти Ӗҫ тӑвакан комитечӗн ертӳҫи Айрат Залялов, ял тӑрӑхӗсен пуҫлӑхӗсем, общество организацийӗсен ертӳҫисем, ашшӗ-амӑшӗсем саламласа, ырă çул сунчӗç.

— Сирӗн умӑрта пирӗн Тӑван çӗршыв тăнăçлăхне сыхлас задача тӑрать, — тесе палӑртрӗ Айрат Залялов. — Ҫарта служить тăвасси вӑл — кашни ҫамрӑк ҫыншӑн пысӑк чыс. Эсир ҫартан опытлӑ та вӑйлӑ арҫынсем пулса таврӑнатӑр. Эпир эсир служить тӑвакан ҫар чаҫӗсен командирӗсенчен сирӗн тивӗҫлӗ служба ҫинчен лайăх хыпарсем ҫеҫ кӗтетпӗр. Ырӑ ҫул пултӑр, Сире!

Хулаçырми ял пуҫлӑхӗн Николай Усмендеевăн ывӑлӗ Алексей те ҫара службине кайрӗ.

— Ывӑлăмăр пирӗн ҫемьере пӗртен-пӗр ывăл ача, унран аслăрах икӗ хӗрӗмӗр пур. Алексей Шупашкар хулинчи университетӑн 2 курсне пӗтерчӗ, ҫарта служить тӑвасшӑн пулчӗ. Паллах, эпир ӑна хирӗҫлемерӗмӗр. Эпир ӑна лайӑх служить туса таврăнма, таврӑнсан, паллах, аслӑ шкултан вӗренсе тухтăр, тесе сунатпăр. Ӑнӑҫлӑх пултӑр ӑна, — тет ашшӗ. 

Ҫак кӗрхи призывпа чи малтан Кивӗ Чукал ялӗнчен Ильнур Ахтямов, Чӑваш Çӗпрелӗнчен Евгений Батраков, Петр Варфоломеев тата Хулаçырми ялӗнчен Алексей Усмендеев, Кивӗ Çӗпрел ялӗнчен Дмитрий Мусаткин, Владислав Чернов тата Павел Никифоров, Çӗнӗ Упи ялӗнчен Владислав Макаровпа Даниил Павлов, Матак ялӗнчи Виталий Саминов служить тума кайрӗҫ. Вӗсене кашнинех ҫул ҫинче кирлӗ пулакан япаласем пачӗҫ.

Справка
Кӗрхи призыв вăхăчӗ — октябрӗн 1-мӗшӗнчен пуҫласа декабрӗн 31-мӗшӗччен. Призывниксене Донецк тата Луганск Халӑх Республикисене, ҫавӑн пекех, Херсон тата Запорожье облаҫӗсене службӑна ямаҫҫӗ. Каччăсем ҫулталӑк служить тӑвӗç.