Тӑван чӗлхене упрасси — самана ыйтӑвӗ

1 номерлӗ Кивӗ Çӗпрелӗнчи «Солнышко» ача садӗнче иртнӗ республика конкурсӗн зона тапхӑрӗнче Тутарстан Республикинчи 9 районтан шкулчченхи пӗлӳ паракан 14 педагог хутшӑнчӗ. 
Конкурсра хутшӑнакансене район пуҫлӑхӗн ҫумӗ Алексей Ярухин тата районти çутӗç пайӗн начальникӗ Газинур Халиуллов саламларӗҫ, конкурсантсене ăнăçу сунчӗç.

— Кашни халӑхӑн хӑйӗн историйӗ, хӑйӗн йăли-йӗркисем, хӑйӗн чӗлхи. Вӗсем пурте наци ӑс-хакӑлне упраса хӑвармалли никӗс пулса тӑраҫҫӗ. Ҫакӑн пек мероприятисем ирттерни вара çак хаклӑ еткерлӗхе сыхласа хӑварассинче пӗлтерӗшлӗ вырӑн йышӑнса тăрать. Енчен эпир тӑван чӗлхепе калаҫатпăр иккен, ачасемпе мӑнуксене ҫак чӗлхепе калаҫма вӗрентетпӗр иккен, пирӗн чӗлхен малашлăхӗ пулӗ, нихӑҫан та ҫухалмӗ. Ҫавӑн пек хутлӑх туса хурасси, тӑван чӗлхене, наци традицийӗсене сыхласси, упрасси — педагогсен те тӗп тивӗçӗ, — тесе палӑртрӗ Алексей Ярухинтухса калаçса.

Конкурс темиҫе тапхӑртан тӑчӗ. Воспитательсем ачасемпе пӗрле педагогика мероприятине ирттерчӗç, ҫавӑн пекех, пултарулӑх презентацине сӗнчӗç. Тухса калаçнисене ТР чăваш наципе культура автономийӗн Ӗç тăвакан комитечӗн членӗ Сильвия Чаркина тата кӑҫалхи «Тӑван чӗлхепе литературӑн чи лайӑх педагогӗ» Пӗтӗм Раҫҫейри конкурсӗн ҫӗнтерӳҫи Айсылу Лутфуллина хакларӗç.

Пур сăнавсемпе тата пӗтӗмлетӳсемпе хутшăнакансене Тав ҫырӑвӗсем пачӗҫ. Финала Элкел районӗнчи Наталия Коновалова, Ҫӗпрел районӗнчи Галина Гуряшкина тата Нурлат районӗнчи Людмила Данилова тухрӗҫ. 

Жюри пуçлăхӗ, ТР Наципе культура автономийӗн Ӗç тăвакан комитетăн членӗ Сильвия Чаркина: 

— Республикӑра тӑван чӗлхесене упрас тата аталантарас, наци ăс-хакăлне упраса хӑварас енӗпе тӗрлӗ проектсем ӗҫлеҫҫӗ. Çак конкурс вӗсене шута илет, халлӗхе вӑл пӗрремӗш хут кӑна иртрӗ. Конкурсӑн тӗп тӗллевӗ — тӑван чӗлхепе шкулчченхи вӗренӳ программине пурнӑҫлакан педагогсен пултарулӑхпа професси активлăхне хавхалантарасси. Енчен наци хӑйӗн халӑхӗн тӑван чӗлхипе интересленмест пулсан, унӑн илемлӗ сассине илтмест, вӑл ырӑ кӑмӑллӑ пулнине ӑнланмасть пулсан, малашне мӗн пулассине пӗлме пултараймасть пулсан, чӗлхене ҫухатма питӗ ҫӑмӑл. Ҫавӑнпа тӑван чӗлхене упрасси — самана требованийӗ, — тесе палӑртрӗ вӑл. 

Малалла тăсса

Конкурса Тутарстан Республикин Çутӗç тата наука министерстви, «Тутарстан халӑхӗсен Ассамблеи» регионти обществăлла организацийӗ, Тутарстан Республикинчи халӑхсен Туслӑх çурчӗ ирттереççӗ. 
Конкурсӑн республика тапхӑрӗ ноябрӗн 24-25-мӗшӗнче Тутарстанри халӑхсен Туслӑх çуртӗнче иртӗ.