Сайфихан Нафиева аса илчӗç

Районта пурӑнакансем хӑйсен легендарлӑ ывӑлӗсемпе хӗрӗсене манмаҫҫӗ. Çулран ҫул ентешӗмӗре, хӑй вӑхӑтӗнче Тутарстан Республикин прокурорӗ, Конституци сучӗн судйи пулса ӗҫленӗ Сайфихан Нафиева аса илни çакна çирӗплетсе парать. Кӑҫал та мероприяти район пуҫлӑхӗ Марат Гафаров, ТР прокурорӗн çумӗ Илья Ибрагимов, Ҫӗпрел районӗн прокурорӗ Олег Гайнутдинов, Сайфихан Нафиевӑн ҫывӑх ҫыннисем: ывӑлӗ Гумар Нафиев; кӗрӗвӗ РФ Следстви комитечӗн следстви управленийӗн ертӳҫин çумӗ Ильяс Мусаллимов; ТР Атӑлçи тӑрӑхӗнчи прокуратура ӗҫченӗсем хутшӑннипе иртрӗ.

Хамӑр ентеше халалланӑ митингра тухса калаҫакансем: Сайфихан Нафиев — общество йӗркине сыхлас тата правăна пӑсасран асӑрхаттарас ӗҫе пысӑк пай кӗртнӗ прокурорсенчен пӗри, Уголовнӑй право енӗпе кӑна мар, граждан прави енӗпе те опытлӑ специалист пулнине палăртрӗç.

— Паян эпир республикӑри прокуратура ӗҫченӗсемшӗн наставник пулса тӑнӑ ҫынна аса илетпӗр. Унпа пӗрле ӗçленӗ çынсем паян хӑйсем те прокурорсем пулса ӗҫлеҫҫӗ, Сайфихан Нафиева пӗлекенсем ӑна лайӑх, принциплӑ ҫын пулнă май аса илеççӗ. Вӑл пирӗн хушшăмăртан кайнӑранпа 19 ҫул иртнӗ пулсан та, эпир ӑна астӑватпӑр. Ҫын асаилӳсенче пурӑнать пулсан, вӑл вилмест, теҫҫӗ, — терӗ район пуҫлӑхӗ Марат Гафаров.

Йӑла тӑрӑх, мероприяти вӑхӑтӗнче Сайфихан Нафиев ячӗллӗ район премине те пачӗç. Общество йӗркине сыхлас тата правăна пӑсасран асӑрхаттарас ӗҫе пысӑк тӳпе хывнӑшӑн Сайфихан Нафиев ячӗллӗ премие Кӑҫал Ҫӗпрел районӗнчи тӗп больницӑн врач-стоматологне Владимир Григорьева, 2008 ҫултанпа халӑх дружинин членне, районти культура ҫурчӗн халӑх театрӗн режиссерне Ринат Калимуллина пачӗç.
Республика прокурорӗн ҫумӗ Ильнур Ибрагимов Çӗпрел ҫыннисене ҫакӑн пек мероприяти йӗркеленӗшӗн тав турӗ.

Митинг вӗҫӗнче районти прокуратура стени ҫине хунă Сайфихан Нафиевăн асăну хăми умне чечексем хучӗç. Мероприятире хутшӑнакансем республика экс-прокурорӗн кабинет-музейне те кӗрсе курчӗҫ.

* * *
Ҫак кун, çаплах, «Алтын» спорт комплексра Сайфихан Нафиева асӑнса кӗрешу енӗпе ӑмӑрту та йӗркеленӗччӗ. Килнӗ хӑнасем спортӑн ҫак тӗсне пӑхнă хыççăн, районта Тутарстанăн пулас кӗрешӳçисем ӳснине палăртрӗç.

Сайфихан Нафиев ячӗллӗ кӗрешӳ Кубокӗшӑн 100 яхӑн спортсмен 11 виҫе категорийӗнче кӗрешрӗ. Ҫамрӑк кӗрешӳҫӗсене çав кун спорт ветеранӗ, бокс енӗпе спорт мастерӗ Тутар Паснапуç ялӗнче ҫуралса ӳснӗ Рафагать Салихов сăнаса тăчӗ.

Турнирăн чи ҫамрӑк кӗрешӳçи Азат Рахимов пулчӗ. Кашни виҫе категорийӗнче 1,2,3 вырӑнсем палӑртнӑччӗ. Ҫак вырӑнсене йышӑнакансене пурне те хаклӑ парнесем, турнирăн ҫӗнтерӳҫин грамотисене пачӗç.