ТР Патшалӑх Канашӗн депутачӗ Ринат Гайзатуллин Çӗпрел ҫыннисене йышӑнчӗ

Граждансене йышӑнасси «Единая Россия» Пӗтӗм Раҫҫейри политика партийӗ йӗркеленнӗренпе 22 çул çитнӗ май иртрӗ. 

Ҫак кун Ҫӗпрелне килсен Ринат Гайзатуллин 15 ҫын валли район хаҫатне çырăнчӗ, парнелерӗ. Çакна та палăртса хăварас пулать, Ринат Рауфович хаçат-жураналсене çырăнтармалли тапхăрта хаҫатăмăра яланах пулӑшать — Çӗпрел ҫыннисене «подписка» парнелет. 

Депутат хӑй те хаҫат-журнал вулама юратни, хăйӗн ашшӗпе амӑшӗ те хӑй вӑхӑтӗнче нумай тӗрлӗ хаҫат ҫырӑнса илни ҫинчен калаçрӗ.

2024 ҫулăн I ҫур çулӗшӗн хаçат-журналсене çырăнтару тапхăрӗ пырать. Районти почта уйрӑмӗсем, почтальонсем, интернет çак кунсенче абонентсене йӳнӗрех хакпа çырăнма сӗнеççӗ. 

Редакци те ҫынсене йӳнӗрех ҫырмалли майсем шухӑшласа кӑларать. Пирӗн чӗлхепе ӑна «альтернативлӑ ҫырăнтару» теҫҫӗ. Редакци ҫакна районти предприятисемпе организацисен ӗҫ коллективӗсене, район центрӗнче пурӑнакан ҫынсене сӗнет. 

Пирӗн хаҫатсене ҫавӑн пек майпа районти отрасль технологийӗсен техникумӗн, нумай профильлӗ лицей коллективӗ те çырăнчӗ. Эпир вӗсене хаҫатсене ӗç вырăнӗсене кӳрсе парăпăр. «Туган як», «Таван ен» хаҫатсене çак майпа çырăнмалли хак — 660 тенкӗ. 

Арифзян Бакиров, отрасль технологийӗсен техникумӗн педагогӗ: 

— Эпӗ район хаҫатне вулама юрататӑп, яланах хаваслансах çырăнатăп. Нумаях пулмасть хаҫат страницисенче манӑн сӑвӑсем те пичетленсе тухрӗҫ. Районта пулса иртекен пулăмсемпе паллашса пырас тесен, тӑван енӗн шӑпишӗн сӳрӗк пулман, хамăрăн тăван чӗлхене кӑмӑллакан кашни ҫынах районта тухса тăракан хаçата ҫырӑнса илме тивӗçлӗ тесе шутлатӑп.

Вера Портнова, нумай профильлӗ лицейӗн педагогӗ:

— Район хаҫачӗ ачаранпах чунра. Аттепе анне ӑна питӗ юратса, пӗр-пӗринчен маларах вулама тӑрӑшатчӗç. Эпӗ Чӑваш Паснапуç ялӗнче ҫуралнӑ. Ялта почтальон ҫук. Район хаҫатне ҫырӑнса илме пултарайманшӑн пӑшӑрхантӑм. Акӑ май килсе тухрӗ — эпӗ ӑна хамӑн ӗҫ вырӑнӗнче çырăнтăм.

Хаҫата çырăннă ӗҫ коллективӗсене тав тӑватпӑр. Ыттисене çырăнтару кампанине хутшӑнма чӗнетпӗр. Шӑнкӑравлӑр — эпир коллективсене яланах пыма хатӗр. Телефон: 89179276115, 2-23-43.

Декабрӗн 14-мӗшӗччен кăна çăмăллăхлă çырăнтару вунă кунлăхӗ пырать, 2024 ҫулăн пӗрремӗш ҫур ҫулӗшӗн «Туган як» — «Тăван ен» хаҫатсене йӳнӗрех хакпа, 781 тенкӗпе, çырăнма пулать. Вунă кунлăх хыҫҫӑн хаксем каллех 885 тенкӗ пулаҫҫӗ. 

Апла пулсан, эсир декабрӗн 14-мӗшӗччен çырăнсан, кӗсьере сирӗн 104 тенкӗ юлнине пӗлтерет.
Май пуррипе усӑ курса юлăр! 

Почта уйрӑмӗсемпе е почтальонсемпе ҫыхӑнӑр. Эпир те сире хаҫат çырăнтарма пулӑшӑпӑр. 
Телефон номерӗсем: 2-26-42, 2-23-43.