«Цильна» хуҫалӑхăн ертӳҫи Барис Гафуров 100 экземпляр хаҫат ҫырӑнтарчӗ

Çырăнтару кампанийӗ вӗçлениччен темиҫе кун кăна юлчӗ. Районти «Туган як» – «Тăван ен» хаҫатсене çырăнтарасси те декабрӗн 26-мӗшӗччен çеç тӑсӑлать. Ҫак кун хыҫҫӑн та, паллах, çырăнма пулать, анчах хаҫат январь уйăхӗнче килмӗ.

Редакцишӗн çак тапхӑр, пытармӑпӑр, кӑткӑс пулчӗ. Нумай ялсенче почтальонсем ҫук, почта уйрӑмӗсем хупӑннă ялсем те пур. «Хаҫат ҫырăнма пултараймастпӑр, мӗн тумалла-ха ӗнтӗ?» – тесе пăшăрханакансене, паллах, эпир альтернативлӑ вариантсем сӗнтӗмӗр. Ял ҫынни, хаçата пичетленсе тухнă кунах килӗнче илсе вулама хăнăхнă, малашне те ҫаплах пултăрччӗ, тет. Ҫакна тума, паллах, почта службин ӗҫӗ кирлӗ.

Ял пуласлӑхӗшӗн тӑрӑшакан ҫынсем ҫак ӗҫре тӗрлӗ ҫул-йӗр шыраҫҫӗ. Мӗнпур обществăлла ӗçсем енӗпе ыркăмăлçă пулса тăракан «Цильна» хуҫалӑхăн ертӳҫи Барис Аппаувич Гафуров почтӑпа килсе тухнӑ проблемăсене те татса пама тăрăшнă. «Почта уйрӑмӗн начальникне те, почтальонсене те хушма ӗҫ укҫи тӳлӗп, яла çак ӗçлӗ пулӑшусӑр хăварма пулмасть», – тет вӑл.

Ырă чӗреллӗ ертӳçӗ редакцие те тӗрлӗ енлӗ пулӑшу парса тăрать. Хаçат   çырăнтармалли çак кампанире  те Барис Гафуров 100 экземпляр хаҫат ҫырӑнтарчӗ.

Пӗтӗмӗшпе илсен, эпир хамӑр хаҫатӑн тусӗ пулса юлнисене, кирлӗ вăхăтра пулăшнă кашни çынна тав тунине пӗлтеретпӗр.

«Туган як» хаçат  ҫӗнӗ ҫулта 1000тен ытларах, «Тăван ен» хаçат   1000е яхăн тиражпа тухса тăрӗ. Пĕрле пулар, пĕр-пĕринпе çыхăнăва çухатар мар.

«Тăван ен» хаçата эсир çырăнса ӗлкӗреймен пулсан, сирӗншӗн тата миçе-тӗр кун вăхăт пур-ха, çырăнăр!

Декабрӗн 15-25-мӗшӗчченхи хушăра çырăнакансене хаçатра саламламалли текст пичетлесе кăларма 50% йӳнӗрех пулать.