Андрей Годунова асăнса пӗрремӗш уçă турнир

Турнира Украинӑри ятарлӑ ҫар операцийӗнче вилнӗ çар çыннине Андрей Годунова асӑнса ирттерчӗç. Мероприятие ертсе пыракан Геннадий Карсаков турнира уҫнӑ май, Украина территорийӗнче çар заданисене пурнӑҫланӑ чухне вилнӗ Андрей Годунова халалласа ирттерекен мини-футбол турнирӗ уçăлнă ятпа спортсменсене, хӑнасене пурне те саламларӗ.

Мероприятие пухăннисем хӑйӗн ҫар тивӗҫне чыслӑн пурнăçласа, ятарлă ҫар операцийӗнче çар заданине пурнӑҫланӑ чухне вилнӗ ентешӗмӗре Андрей Годунова аса илсе, пӗр минут шăп тăчӗç.

Андрей ачаранпах спортпа интересленет, питӗ малашлӑхлӑ спортсмен пулать. Тӗпрен илсен, футболпа интересленет, ҫавӑнпа унӑн тусӗсемпе юлташӗсем ҫак турнирăн пуçаруçисем пулса тăчӗç. Турнирта çак спорт енӗпе ултă команда хутшăнма кăмăл турӗ. Андрей Годуновăн кӗçӗн Тăван çӗршывӗнчен — Ҫӗнӗ Йӗлмел ялӗнчен икӗ команда — ҫитӗннисемпе ҫамрӑксем, унтан Хулаçырминчен, Чăваш Паснапуçӗнчен, Кивӗ Çӗпрел тата Аслă Аксуран пухса йӗркеленнӗ командăсем килнӗччӗ. Раҫҫей тата Тутарстан Республикин Гимнӗсен кӗввипе Ҫӗпрел районӗнчи мини-футбол турнирӗ уçăлчӗ. 

Ҫӗпрел районӗн пуҫлӑхӗ Марат Гафаров сăмах илсе, спортсменсене, хӑнасене тата вăй парса тăма килнисене саламларӗ. Вӑл Годуновăн амӑшне ывӑлне чӑн-чӑн патриот тата Герой пулма вӗрентсе ӳстернӗшӗн тав турӗ. «Пирӗн геройсене пӗлсе, асра тытса пурӑннă вăхăтра, вӗсем пирӗнпе пӗрле пурӑнӗç», — тесе палӑртрӗ. Андрейăн амӑшне асӑнмалӑх парне пачӗ. Андрейăн мăшăрӗ Екатерина Олеговна тата Андрейăн йӑмӑкӗ Марина Владимировна ҫак турнира йӗркелекенсене хӑйсен ҫывӑх ҫыннине манманшӑн тав турӗç, çак мероприяти пирӗн телейлӗ пуласлӑхшӑн пурнӑҫне панӑ ҫынна хисеплени тата асра тытни, тесе палăртрӗç. 

Ҫавӑн пекех, Çӗнӗ Йӗлмел ял тӑрӑхӗн пуҫлӑхӗ Роберт Дружков та тухса калаçса, çаплах, ҫак турнир йӑлана кӗрсе ҫулсерен иртессе, унӑн тусӗсемпе юлташӗсем ҫак мероприятие малашне хӑйсен тусӗпе ҫывӑх ҫыннине асӑнса йӗркеленессе шаннине пӗлтерчӗ. Андрейӗн амăшне Тамара Петровнӑна турнира уҫнӑ ятпа асӑнмалӑх парне пачӗ. 

Ҫак турнира хатӗрлес тата ирттерес ӗҫе хутшӑннӑшӑн ял пуҫлӑхӗ Илья Карсаковпа Александр Головина грамотӑсем, çак пулăма халалласа, ял ҫамрӑкӗсен ятӗнчен, Çӗнӗ Йӗлмел вӑтам шкул директорне Владимир Мискина асӑнмалӑх сувенир — футбол мечӗкӗ пачӗ. 

Турнира уҫнӑ ҫӗрте районти «Çар юхăмӗсен ветеранӗсен Совечӗ» вырӑнти обществăлла организацийӗн ертӳçи, Афган вӑрҫин ветеранӗ Виктор Петухов хутшӑнчӗ. «Çак мероприяти патриотла пӗлтерӗшлӗ. Мӗншӗн тесен пирӗн ҫамрӑксен хушшинче ялан патриотла ӗҫ илсе пымалла, нацизмпа ҫапӑҫса вилнӗ, ҫар тивӗҫне пурнăçласа кирек мӗнле ҫапӑҫӑва та хутшӑннӑ ҫынсене пурне те асра тытмалла», — терӗ. 

Ҫурҫӗр Кавказри ҫапӑҫусен ветеранӗсен ячӗпе краевед, волонтер, Шалти ӗçсен министерствин запасри подполковникӗ Владимир Ярухин тухса калаçрӗ. Вӑл ятарлă çар операцийӗнче хутшăнакан çар çыннисене пулӑшу пани пысӑк пӗлтерӗшлӗ пулнине палӑртрӗ, хӑйӗн юлташӗсемпе пӗрле Донбасс территорине ятарлӑ ҫар операцине хутшӑнакансене гуманитари пулӑшӑвӗ парас енӗпе ӗҫе хутшӑнни çинчен, пирӗн халӑх малашне те Украина нацисчӗсен атакисене сирсе яма пирӗн ҫар çыннисене пур майпа та пулӑшасса шаннине пӗлтерчӗ. 

Хӑйӗн шухӑшне активлӑ волонтер, Афганистанри ҫапӑҫусен ветеранӗ, подполковник Марс Саяпов та ҫак патриотла пуҫарӑва пысӑка хурса хакларӗ. Çакӑ Раҫҫейӗн запасри салтакӗсене чун-хавалне ҫӗклеме тата хӑйсен пурнӑҫне Раҫҫей интересӗсемшӗн панӑ ҫынсене манма май паман анлӑ акци пулнине палӑртрӗ.

Ҫавӑн пекех тухса калаçакансем ҫак турнирăн спонсорӗсене саламласа, тав турӗç, вӗсене сывлӑх, ҫемьере тăнăçлăх, ӗҫре ҫитӗнӳсем тата хӑйсен ӗҫне аталантарма ăнăçу сунчӗç, мӗншӗн тесен вӗсемсӗр ҫак турнир пулас ҫук. 

Ӑмӑрту пӗтӗмлетӗвӗ тӑрӑх 6-мӗшпе 5-мӗш вырăнсене Чăваш Паснапуç тата Çӗнӗ Йӗлмел — 2 командисем, 4-мӗш вырăна Аслă Аксу ялӗн команди, йышăнчӗç. Хулаçырми ялӗн команди 3 вырӑн йышӑнса, бронза медале тивӗçлӗ пулса тӑчӗ. 2 вырӑна Ҫӗнӗ Йӗлмел вӑйçисем тухрӗç. Кивӗ Ҫӗпрел команди вара мини-футбол турнирӗн ҫӗнтерӳҫи пулса тӑчӗ. 

Турнирӑн чи лайӑх вӑйçисене те палăртрӗç: чи лайӑх тапăнакан — Илья Карсаков (Ҫӗнӗ Йӗлмел), чи лайӑх хапхаçă — Дмитрий Каранкин (Хулаçырми), чи лайӑх хӳтӗлекен Нияз Валиуллин (Кивӗ Ҫӗпрел) пулса тăчӗç.

Турнирăн ҫӗнтерӳҫисемпе призерӗсем те спонсорсенчен асӑнмалӑх парнесем, грамотӑсем, командăсем вара кубоксем илчӗç. 

Турнир вӗçленсен турнирӑн тӗп судьи, физкультурӑпа спорт отличникӗ, асӑннӑ мероприятийӗн пуҫаруçисен пӗри Петр Рафиков ял тӑрӑхӗн пуҫлӑхӗпе Роберт Дружковпа пӗрле хӑнасене турнир ячӗпе вымпелсемпе медальсем пачӗҫ.

Справка

Андрей Владимирович Годунов 1995 ҫулхи декабрӗн 12-мӗшӗнче Ҫӗнӗ Йӗлмел ялӗнче нумай ачаллӑ ҫемьере ҫут тӗнчене килет. Андрей 2002 ҫулта вӑтам шкулӑн пӗрремӗш класне вӗренме кӗрет, вӗренӳ вӑхӑтӗнче пултаруллӑ вӗренекен пулса хӑйне лайӑх енчен çеç кӑтартать. 2013 ҫулта Ульяновскри строительство колледжне вӗренме кӗрет, 2014 ҫулхи ноябрь уйӑхӗнче ӑна ҫара илеççӗ, Екатеринбург хулинчи Раҫҫей ҫарӗн ретӗнче васкавлӑ службине иртет. 2018 ҫулхи март уйăхӗнчен пуҫласа Ульяновск хулинчи 31-мӗш гварди десант-штурмлакан бригадăн разведка батальонӗнче службăра тăрать. Рядовой Андрей Годунов Украинӑри Донец облаҫӗнчи Белогоровка ялӗ патӗнче ятарлă ҫар операцийӗ пынă вăхăтра,

ҫар тивӗҫне пурнӑҫланӑ чухне вилет. 
Хăюлăхпа паттӑрлӑхшӑн ăна Раҫҫей Федерацийӗн Оборона Министерствин медалӗпе, Хӗвелтухӑҫӗнчи — 2018 çарсен маневрӗсене хутшӑнакан пулнă май, медальпе, Кавказра контртерроизмла операцие хутшӑннӑшăн, тӑваттӑмӗш степеньлӗ Çвятуй Георги хӗресӗпе тата Паттӑрлӑх орденӗпе наградӑланать (вилнӗ хыççăн).