Апат-çимӗç пуххисемпе иккӗмӗш автопоезд килчӗ

Çак акци ТР Президенчӗ Рустам Минниханов пулӑшнипе пуҫланса кайрӗ. Тата акӑ Ҫӗпрел районне апат-ҫимӗҫ пуххипе иккӗмӗш автопоезд килчӗ.

Акци шайӗнче Çӗпрел ҫыннисене 417 апат-ҫимӗҫ пуххи парӗҫ. Çак апат-çимӗç пуххисене пурӑнмалли минимумран пӗчӗк пулнă тата  сакӑр ҫултан аслӑрах ачасене воспитани паракан сахал тупăшлă çемьесене; алимент илеймен ачаллă ҫемьесене; пенсийӗсем пурӑнмалли минимумран пӗчӗккӗ пулнă 65 çултан аслăрах çынсене;  социаллӑ хӑрушлӑхра пулнă ҫемьере воспитани илекен ачасене; ҫавӑн пекех пандеми условийӗсенче ӗҫлесе сиен курнă харпăр хăйне ӗçпе тивӗçтернисене, уйрăм  предпринимательсене параҫҫӗ.

Автопоезд ҫитсенех волонтерсем апат-çимӗç пуххисене пушатмалли ӗçе, унтан адрессем енӗпе валеҫме пуçăнӗç. Çакна та палăртса хăварас килет, волонтерсем чунтан пулӑшаççӗ. Вӗсем хушшинче ӗҫлекен ҫамрӑксем те, уйрӑм предпринимательсем те, вӑтам ҫулсенчи ҫынсем те пур.

Волонтер ролӗнче паян район пуҫлӑхӗ Марат Гафаров çӳрерӗ. Апат-ҫимӗҫ пуххисене вӑл Ҫӗпрелӗнчи Светлана Хуснетдиновапа Рамзия Саидмуратова валли хӑй илсе килчӗ. Светлана Хуснетдинова – уйрӑм предприниматель, трикотаж тумтирӗ сутмаллипе интересленет. Вӑл хӑйӗн ӗҫне икӗ ҫул каялла уҫнӑ пулнă. Унсӑр пуҫне Светлана – нумай ачаллӑ амӑшӗ, унӑн 16, 13 тата 9 ҫулхи виçӗ ачи пур.

– Коронавируспа çыхăннă лару-тăру пирӗн ӗҫ ҫине питӗ пысăк витӗм кӳчӗ. Лавккара суту-илӳ самаях чакрӗ. Ачасене, ҫемьене тӑрантармалла. Ҫак лару-тӑру йӗркене кӗрӗ тесе ӗмӗтленетпӗр. Йывӑр вӑхӑтсенче пире пулӑшакансене пурне те тав тунине пӗлтеретӗп. Пирӗн ҫемьешӗн апат-ҫимӗҫ пуххи пысӑк пулӑшу пулса тăрать, – тет Светлана. Рамзия Саидмуратова ҫемйинче пилӗк ача ӳсет. Вӗсенчен чи аслине 17 ҫул, кӗҫӗннине  – 2 ҫул. – Пирӗн ҫемье пысăк. Ҫавӑнпа кирек мӗнле пулӑшу та пирӗншӗн пысӑк савӑнӑç. Ҫак пархатарлӑ ӗҫе пурнăçлакансене пурне те тав тунине пӗлтерес килет, – терӗ Рамзия Тагировна.

Аса илтеретпӗр, Ҫӗпрел районне пӗрремӗш апат-ҫимӗҫ пуххисем 2020 ҫулхи майӑн 3-мӗшӗнче килчӗç. Унта та район пуҫлӑхӗ Марат Гафаров волонтер пулнă май акцире хутшӑнчӗ.

Çавăн пекех апат-çимӗç пуххине  Кивӗ Йӗлмелӗнче пурăнакан Нина Сергеева та илчӗ. Унӑн пенсийӗ пурӑнмалли минимумран пӗчӗкрех. Нина Геннадиевна ӗмӗрӗпех больницăра медсестра пулса ӗçленӗ. Вӑл та кашнине тав сӑмахӗсем каларӗ.

Виҫҫӗмӗш хут апат-çимӗç пуххи  Ҫӗпрел районне икӗ эрнерен килет. Июнь вӗҫӗнче тата пӗр автопоезд апат-ҫимӗҫ пуххисем илсе килӗ.