Регионсен шайӗнчи «Çĕнĕ хум» литература пултарулăх конкурсĕ

Чăваш Республикин Культура министерстви, Чăваш наци конгресĕ, Чăваш Республикин наци библиотеки, И.Я.Яковлев ячĕллĕ Чăваш патшалăх педагогика университечĕ И.Я.Яковлев çĕнĕ чăваш алфавитне тунăранпа 150 çул, «Чăваш халăхне» халала çырнăранпа 100 çул çитнине халалланă регионсен шайĕнчи  «Çĕнĕ хум» литература пултарулăх конкурсне ирттереççĕ. Конкурса Раççей Федерацийĕн регионĕсен тата Чăваш Республикин пĕтĕмĕшле пĕлӳ паракан вĕренӳ учрежденийĕсен 7–11-мӗш класӗсенче, професси вӗренӗвӗн учрежденийӗсенче (колледжсемпе техникумсенче), аслă шкулсенче вӗренекенсене хутшăнма чĕнеççĕ. Конкурс 2021 çулхи нарăс уйăхĕн 1-мĕшĕнчен пуçласа ака уйăхĕн 1-мĕшĕччен пырать.

Конкурс йĕрки

Çамрăк чăваш çыравçисен ирĕклĕ е сĕннĕ темăпа литература хайлавĕсем çырса конкурса хутшăнма юрать. Калав, очерк, çыру, интервью, эссе, сăвă çырма сĕннĕ темăсем:

– «И. Я. Яковлевăн «Халалне» мĕнле ăнланатăп тата йышăнатăп»;

 – «Ман пурнăç тĕрекĕ»;

 – «Иван Яковлев патне çыру çыратăп»;

 – «И. Я. Яковлев çинчен калас сăмахăм»;

 – «Çыруллă халăхăн чĕлхи çухалмасть»;

 – «Иван Яковлевича «палăк» лартнă пулăттăм»;

 – «Тěрěс калаçасси тата çырасси – пирěн тивěç»;

 – «Иван Яковлев çутă сăнарĕ çамрăксен чĕринче упранать».

 Литература хайлавĕсенче аслă Вĕрентӳçĕн сăн-сăпачĕпе пархатарлă ĕçĕ-хĕлне кăтармалла, хăвăрăн ăшри шухăшпа кăмăл-туйăма уçса памалла. Проза хайлавĕсен калăпăшĕ 5–6 страницăран ытла, сăвăсен хисепĕ 3-рен кая пулмалла мар. Хайлавсене компьютерпа А4 форматлă шурă хут листи çине Alt пусмалли Times New Roman шрифтпа, 12 №-лĕ пысăкăшпа, 1,5 йĕрке хушшипе, сулахай енчен хĕррине (поля) 2,5 см, сылтăм енчен – 1,5 см хăварса пичетлемелле. Çамрăк авторсен литература хайлавĕсенче конкурсăн номинаци ятне, хăйсен хушаматне, ятне тата ашшĕ ятне, хăш шкулта (колледжра е аслă шкулта), миçемĕш класра (ушкăнра, курсра) вĕреннине, район (хула), республика (область, край) ятне чăвашла тата вырăсла çырмалла. Пултарулăх ăмăртăвне хатĕрлекенěн хушаматне, ятне, ашшĕ ятне, кĕсье телефонĕн номерне кăтартмалла. Компьютерпа чăвашла пичетленĕ хайлавсене 2021 çулхи нарăс уйăхĕн 1-мĕшĕнчен пуçласа ака уйăхĕн 1-мĕшĕччен «Литература конкурсне» паллăпа çак адреспа йышăнаççĕ: 428032, Чăваш Республики, Шупашкар хули, Воробьев композиторсен урамĕ, 10 çурт, Чăваш наци конгресĕ.

Тӗплӗнрех конкурс çинчен пӗлме телефон номерӗ: 62-35-61. Электрон почти: conqress21@mail.ru

11-мĕш класра вĕренекен çĕнтерӳçĕсене И.Я.Яковлев ячĕллĕ Чăваш патшалăх педагогика университечĕн чăваш тата вырăс филологийĕн факультечĕн чăваш уйрăмне вĕренме кĕнĕ чухне хушма балл параççĕ.

Çĕнтерӳçĕсемпе призерсен списокне Чăваш Республикин Культура министерствин, Чăваш наци конгресĕн, Чăваш Республикин наци библиотекин сайчĕсенче вырнаçтараççĕ.

«Çĕнĕ хум» литература пултарулăх конкурсĕн çĕнтерӳçисемпе призерĕсене дипломсемпе хаклă парнесем парса чыслаççĕ. Конкурса хутшăннисене пурне те сертификат параççĕ. Çĕнтерӳçĕсемпе призерсен ертӳçисене Тав хучĕпе хавхалантараççĕ.