Служба срокӗ малтанхи пекех юлать

Граждансене ҫар службине декабрӗн 31-мӗшӗччен илӗç.

Ҫак кунсенче районти «Патриот» ҫамрӑксен  центрӗнче кӗрхи призыв комиссийӗ ӗҫлерӗ. Медицина комиссийӗ кашни призывник сывлӑхне ҫар службине юрӑхлине палӑртса, çар службине кайма тивӗçлӗ призывника тӗплӗн тӗрӗслет. Призыв комиссийӗ вара, призывниксен пӗлӗвне, профессине, ҫемье лару-тӑрӑвне тата ытти пӗлтерӗшлӗ факторсене шута илсе, вӗсен харпӑр ӗҫӗсене вӗренет. Аслӑ вӗренӳ çурчӗсенче вӗренекенсене вара  тӑхтав парӗҫ.

Кӗрхи призывӑн уйрӑмлӑхӗсем мӗнле? Призыв кампанийӗнчи ҫӗнӗлӗхсемпе тата ытти ыйтусем ҫине пире Пӑва тата Çӗпрел районӗсенчи ҫар комиссарӗ, подполковник Радик Тухфатуллин хуравларӗ.

– Раҫҫей Президенчӗн 2025 ҫулхи декабрӗн 29-мӗшӗнчи Указӗпе килӗшӳллӗн, халӗ призыв ҫулталӑкӗпех – 2026 ҫулхи январӗн 1-мӗшӗнчен пуҫласа декабрӗн 31-мӗшӗччен – пурнăçланать. Ҫулталӑк хушшинче граждансене медицина тӗрӗслевӗ ирттереҫҫӗ, вӗсене профессилле психологи тӗлӗшӗнчен суйласа илес енӗпе мероприятисем ирттереҫҫӗ, ҫавӑн пекех, призыв комиссийӗсем граждансем тӗлӗшпе призывран е ҫар службине кайма тӑхтама йышӑнусем тума пултараҫҫӗ.

Кӑҫалхи январӗн 1-мӗшӗнчен çар службине Çар учечӗн Пӗрлехи реестрӗн патшалӑх информаци тытӑмӗпе усӑ курса чӗнеҫҫӗ. Енчен те призывник пӗр сӑлтавсӑрах 20 кун хушшинче килмесен, «Çар тивӗҫӗпе ҫар служби ҫинчен» законпа вӑл килессине тивӗҫтерме пулӑшакан вӑхӑтлӑх чару мерисемпе усӑ кураҫҫӗ. Электронлӑ повестка яни, вӑхӑтлӑх чару мерисемпе усӑ курни тата пӑрахӑҫлани ҫинчен калакан пӗлтерӳсене гражданинӑн харпӑр кабинетне ярса параҫҫӗ.

Ачаллӑ, чирлӗ тата ватӑ ашшӗ-амӑшӗ пулнă граждансене ҫар службине каймаллин палӑртнӑ нормисен шайӗнче пурӑнакан вырӑн ҫывӑхӗнче вырнаҫнӑ ҫар чаҫӗсенче служба иртме май туса парӗҫ.

Призывпа ҫар службине иртекен призывниксене Донецк тата Луганск Халӑх Республикисене, Херсон тата Запорожье облаҫӗсене, ҫавӑн пекех, ятарлӑ ҫар операцийӗн зонине ямаҫҫӗ. Хальхи вӑхӑтра ятарлӑ ҫар операцийӗнче ҫар службине иртессине контракт тунӑ граждансем туллилентереҫҫӗ. Законпа контракта 18 ҫул тултарсан, призывник Ҫар присягине йышӑннӑ хыҫҫӑн та, тума пулать.

Водитель ӑсталӑхӗн специальноҫӗсем ӗлӗкренех кирлӗ пулнӑ, халӗ те кирлӗ. Палӑртмалла: призывниксене федераци бюджечӗн укҫи-тенкипе хатӗрлеҫҫӗ. Пӗтӗм тӗнчери ӑмӑртусене хутшӑнакансем спорт ротинче службăра тӑма пултараҫҫӗ. Спорт ротине лекес тесен призывникӑн олимп спорт тӗсӗпе Раҫҫейӗн пӗрлештернӗ командине кандидат пулмалла, ӑна сывлӑх сыхлав министерстви яракан списока кӗртмелле.

Унсӑр пуҫне призыв тапхӑрӗнче Тутарстан Республикин порталӗнче «ТР ҫар комиссариачӗ» пайра «Хӗрӳ лини» ӗҫлет. Унта республикӑри муниципаллӑ районсенчи ҫар комиссариачӗсен тата хӗрӳ линисен телефон номерӗсене пухнӑ. ТР çар комиссариатӗнче шӑнкӑравланисене куллен ӗҫ кунӗсенче 9:00 сехетрен пуҫласа 18:00 сехетчен, эрнекун 16:45 сехетчен йышӑнаҫҫӗ.

Хӑвӑр ҫинчен калакан информацие ҫар учечӗн реестрӗнчен те тӗрӗслеме пулать. Кун валли реестрповесток.РФ сайтӗнчи Харпӑр кабинетпа усӑ курмалла е нумай функциллӗ центра (МФЦ) хӑвӑрăн каймалла.

Тутарстан Республикин сборнӑй пункчӗн ӗҫне 2026 ҫулхи октябрӗн 15-мӗшӗнчен пуҫлама палӑртнӑ. Призыв ҫулӗ 18 ҫултан пуҫласа 30 ҫулччен пулӗ, служба срокӗ малтанхи пекех 12 уйӑх.