Чүпрәледә өлкәннәрне хөрмәтлиләр

Бүген, 3 октябрьдә, Россия Пенсионерлар союзының Чүпрәле районындагы бүлекчәсе башлыгы Дилүзә Азизова районның Чыгарышлылар паркында Өлкәннәр декадасы кысаларында өлкәннәр өчен бәйрәм оештырган иде.

Иртәдән үк бәйрәм үтәсе чыгарышлылылар паркында музыка яңгырады, өлкәннәр бер-берсе белән күрешеп, хәл-әхвәлләрен белештеләр.

Районыбызның өлкәннәрен Район Пенсия фонды бүлеге начальнигы Роза Гафарова һәм Россия Пенсионерлар союзының җирле бүлекчәсе җитәкчесе Дилүзә Азизова сәламләп, бәйрәм белән тәбрикләделәр.

— Хөрмәтле өлкәннәребез, сезнең бүгенге чарада катнашуыгызга бик шатланабыз. Бүгенге бәйрәм сезнең хөрмәткә әзерләнде, рәхәтләнеп ял итегез, кушылып җырлагыз, биегез.Район тормышында актив катнашуыгыз, актив гражданлык позициясендә торуыгыз һәм тынгысыз җанлы булуыгыз өчен сезгә рәхмәт әйтәбез. Болар безнең өчен бик мөһим, чөнки сез акыллы, тәҗрибәле һәм тормышны нигезеннән аңлаучы буын кешеләре. Киләчәктә дә менә шушылай очрашып, сау-исән яшәргә язсын сезгә,-диделәр алар өлкәннәргә мөрәҗәгать итеп.

Өлкәннәребез бәйрәм дәвамында рәхәтләнеп күңел ачтылар, гармунга кушылып яшьлектәге җырларын җырладылар, биеделәр, вальс әйләнделәр.

Бу матур чара көзге мул уңышлы өстәл, кайнар чәй артында дәвам итте. Ике сәгатьтән артыкка сузылган очрашу кичәсе бик тиз узды да китте.

Бәйрәмгә килгән өлкәннәр чараны оештырып, шундый матур очрашу бүләк иткән Дилүзә Азизовага олы рәхмәтләрен җиткерделәр.

ФОТОлар