Сатып алган товарың канәгатьләндермәсә

Күпләр әлеге өлкәдә үз хокукларын белмиләр. Шушы уңайдан Иске Чүпрәледән мөрәҗәгать итүче Әлфия ханымга Яшел Үзән территориаль органы контроль- инспекция бүлегенең әйдәп баручы белгеч-эксперты Гөлинә Юсупова җавап бирә.

Сорау: Пластик тәрәзә-ләр ясауга һәм куеп ук бирүгә килешү төзегән идем, әмма төгәлсезлекләргә тап булдым. Эш башкаручыга карата мин нинди дәгъва белдерә алам?

Җавап: "Кулланучылар хокукын яклау" законының 29 маддәсе нигезендә, кулланучы җитештерүчедән төгәлсезлекләрне бетерүне, яисә эшне тулаем яңадан башкаруны таләп итә ала. Әгәр дә килешүдәге төгәлсезлекләр билгеләнгән вакытка бетерелмәсә, кулланучы күрелгән зыян өчен акчаны тулысынча кайтарырга хокуклы.

Әйтелгәннәр закон нигезендә башкарылсын өчен, эшне башкаручыга язма рәвештә мөрәҗәгать итәргә кирәк. Мөрәҗәгать язуы ике данәдә булырга тиеш. Үзегездә кала торганында эшне башкаручы тарафыннан дата, имза куела. Эш башкаручы ризасызлык белдереп, кул куюларны кире какса, мөрәҗәгать кәгазен почта аша җибәрергә кирәк.