Бу көннәрдә бар җиһан Тукайны искә ала дисәк тә дөрес булыр. Республикабыз шәһәрләрендә, авылларында, хаттә чит илләрдә яшәүче милләттәшләребез дә Тукай шигырьләрен укый. Олуг шагыйребезнең 130 еллыгына багышлап Казанның М. Сәлимҗанов исемендәге Актёрлар йортында "Тукай замандашлары" дип аталган VI Халыкара шигырь уку бәйгесе узды.
Шигырь укучыларның Г.Тукай исемендәге Бөтенроссия бәйгесе - милли мирасны саклап калу, татар телен пропагандалау, заманча милли шигъриятне үстерүгә, шулай ук балалар һәм яшьләр иҗатын активлаштыруга юнәлдерелгән социаль мәдәни-агарту проекты. Бәйгедә катнашу өчен Татарстан Республикасы, Мәскәү, Мари Эл, Башкортстан, Кытай, Индонезия, Төркиядә яшәүчеләрдән 500 гариза кабул ителгән. Шигырь укучылар арасында 7 яшьлек балалар, театр һәм музыка училищесы, югары уку йортлары студентлары да бар. Балалар яшьләренә карап көч сынашты. Укучыларның тырышып- тырышып Тукай, аның замандашлары шигырьләрен сөйләүләренә күңел үзеннән-үзе сөенде. Бу хакта жюри рәисе, Татарстанның атказанган артисты, Казан театр училищесы мөгаллиме, танылган диктор Инсаф Абдулла:
- Бирегә сәләтсез балалар килмәгән. Аларның сәхнәгә менеп Тукай шигырьләрен укуы гына да ни тора! Димәк, милләтебез яшиячәк әле. Мондый яшьләр булганда Тукай, Алишлар онытылмас. Балаларны бәйгегә әзерләп китергән җитәкчеләргә зур рәхмәт, - диде.
Тукайның 130 еллыгына багышланган бәйгеләрдә Иске Чүпрәле беренче номерлы гомуми урта белем бирү мәктәбенең 2 б сыйныф укучылары да актив катнашты. Күптән түгел генә "Илһамият" республика фестиваль-конкурсында Миначев Алмаз Г.Тукайның "Пар ат" шигырен башкарып 2 дәрәҗәдәге дипломга лаек булса, "Тукай замандашлары" конкурсында Әхмәдова Алия А. Алишның "Бал корты һәм Шөпшә" әкиятен сөйләп "Иң оста башкаручы" номинациясендә дипломга лаек булып 22-нче апрельдә М.Сәлимҗанов исемендәге Актерлар йортында гала-концертта катнашу бәхетенә иреште.
Киләчәгебезне күзаллау өчен мондый бәйгеләр кирәк. Озак та үтмәс, халык яшь буынның шигырьләрен укыр, җырларын җырлар, алар язган сценарийлар буенча куелган спектакльләргә йөрер. Алмашка мондый балалар үсә икән, димәк, татар теленең дә, мәдәниятебезнең дә киләчәге бар.
Иң мөһим һәм кызыклы язмаларны Татмедиа Telegram-каналында укыгыз
