Урамăм, картишӗм, эсӗ маншӑн питӗ хаклӑ

Ӗҫ нумай енлӗ пулчӗ. Малтан автомашинӑсемпе ача-пӑча площадкисене вырнаҫтармалли вырăна тикӗслерӗç, ҫавӑн пекех, асфальт хума никӗссем хатӗрлес ӗҫсене те туса ирттерчӗç. Машинăсене лартма вырӑнсем тунӑ. Строительсем, çаплах, ҫул, тротуар хӗррисене бордюрсем хучӗç, ача-пăча площадкине хӑйӑр кӳчӗç, ăна тикӗслерӗç. Подъезд умӗнчи площадка та урӑх сӑнлӑ – унта вара ҫӗнӗ асфальт сарчӗç.

Аса илтеретпӗр, картишсене тирпей-илем кӗртмелли схемӑна кӑҫалхи апрель уйӑхӗнче ҫак ҫуртсенче пурӑнакансемпе тӗл пулнӑ чухне сӳтсе явнӑччӗ. 11 номерлӗ ҫуртра пурӑнакан Лилия Атауллова палӑртнӑ тӑрӑх, строительствӑна хатӗрленнӗ чухне пур сӗнӗве те шута илнӗ.

– Ҫак ҫуртсене килнӗ хӑнасем хӑйсен машинисене ӑҫта лартмаллине  те пӗлмесӗр, аптăраса тăратчӗç. Халӗ ӗнтӗ ку чухнехилле машинăсем лартмалли вырăн туса хучӗç. Ачасем валли вӑйӑ площадкисем йӗркелерӗç. Пирӗн картишӗмӗр ҫӗнелсе тасалса юлчӗ, – тет Лилия Атауллова.

Справка

«Пирӗн картиш» («Наш дворик») картишсен территорийӗсене тирпей-илем кӗртес енӗпе Президент программине 2020 ҫулта хута янӑччӗ. Икӗ ҫул хушшинче Тутарстанӑн 2167 нумай хутлă çурт-йӗрсен картишӗсен территорине юсаса ҫӗнетнӗ, республикӑра пурӑнакан 660 пин ытла ҫынна хăтлă условисем туса панă.