Чүпрәледә Социалистик Хезмәт Герое Әхмәтгәрәй Шакирҗан улы Әбдриевның 100 еллыгы билгеләп үтелде

Район үзәгендәге Геройлар Аллеясында Социалистик Хезмәт Герое, XXII партсъезд исемендәге колхоз рәисе Әбдриев Әхмәтгәрәй Шакирҗан улының 100 еллыгына багышланган митинг узды.
Герой өч Ленин ордены, Октябрь революциясе, Хезмәт Кызыл байрагы, 2 нче дәрәҗә Ватан сугышы орденнары, медальләр белән бүләкләнгән.

Чарада район башлыгы Марат Гафаров, ТР Дәүләт Советы депутаты Ринат Гайзатуллин, район Башкарма комитеты җитәкчесе Рөстәм Мөхәммәтҗанов, оешма һәм учреждение җитәкчеләре, хезмәт коллективлары, район ветераннары, мәктәп укучылары, лицейчылар, күп тармаклы технологияләр техникумы студентлары, Иске Шәйморза урта мәктәбе укучылары катнашты. Бюст каршында җыелганнар, Иске Шәйморза урта мәктәбе укучылары Геройның хезмәт батырлыклары турында сөйләделәр.

Район башлыгы Марат Гафаров һәм ТР Дәүләт Советы депутаты Ринат Гайзатуллин, районның Мактаулы гражданы, хезмәт ветераны Фиркать Җәлалов Герой турындагы якты истәлекләре белән уртаклаштылар, геройларыбызны, аларның якты истәлеген һәм хезмәт батырлыгын һәрвакыт истә тотарга кирәклеген ассызыкладылар.

Ә Әхмәтгәрәй Шакирҗан улының балалары Зөбәрҗәт һәм Рөстәм чыгыш ясап, әтиләрен онытмаганнары һәм хөрмәт иткәннәре өчен район хакимиятенә, чарада катнашучыларга олы рәхмәтләрен белдерделәр.
Геройлар аллеясында урнаштырылган Герой бюсты итәгенә чәчәкләр салынгач, аның якты истәлеге бер минут тынлык белән искә алынды.

Белешмә

Әбдриев Әхмәтгәрәй Шакирҗан улы районның Иске Шәйморза авылында туган, Бөек Ватан сугышында катнашкан, авыр яраланган һәм демобилизацияләнгән. Өйгә кайткач, совет һәм партия органнарында эшли.

1955 елда Сталин исемендәге (1961 елдан XXII партсъезд исемендәге) колхозга рәис итеп билгеләнә. 1970 еллар башына колхозның берничә миллион сумлык ирекле акчасы була. Әхмәтгәрәй Әбдриев районда беренче булып үз хуҗалыгында эчке хуҗалык хисабын кертә, хезмәт өчен түләүнең премиаль системасын булдыра, социаль өлкәне үстерүгә зур игътибар бирә.

Күп тапкырлар СССР һәм ТАССР Халык Хуҗалыгы Казанышлары Күргәзмәсендә катнаша. 1971 елда авыл хуҗалыгы җитештерүен үстерүдә зур уңышлары өчен Әхмәтгәрәй Әбдриевка Социалистик Хезмәт Герое исеме бирелә һәм аңа Ленин ордены һәм «Ураҡ һәм Чүкеч» алтын медале тапшырыла.

XXII партсъезд исемендәге хуҗалык белән 30 елдан артык, пенсиягә чыкканчы, 1988 елга кадәр җитәкчелек итә.
1982 елда аның инициативасы белән Иске Шәйморза авылында «Җир һәм кешеләр» музее ачыла.