Автомобильне исәпкә кую өчен моннан соң ОСАГО кирәкми: нәрсәләр үзгәрәчәк?

Хәзер үзгәрешләр "РФдә транспорт чараларын дәүләт теркәве турында"гы законга кертеләчәк. Полисны яңа автомобильне теркәгәндә дә, милекчене алыштырганда да таләп итмәячәкләр. 2024 ел ахырында ОСАГО полисы булмаган өчен фотовидеофиксация камералары штраф салачак, дип көтелә. Шуңа күрә теркәлү вакытында өстәмә рәвештә полис булу-булмавын тикшерүнең мәгънәсе булмаячак.

Машинаны исәпкә ничек куелачак? 

Машина хуҗалары өчен принципиаль үзгәрешләр юк. ОСАГО полисы кирәк булмаячак.
Элеккечә, машина 10 көн эчендә теркәлергә тиеш булачак. ЮХИДИга чиратка язылуны Дәүләт хезмәтләре порталы аша эшләргә мөмкин. Һәм түбәндәге документлар кирәк булачак:
— РФ гражданы паспорты;
— транспорт чарасы паспорты (әгәр ул кәгазь булса);
— теркәлү турында таныклык (әгәр автомобильне яңадан теркәсәләр);
— сату-алу килешүе;
— дәүләт пошлинасын түләү турында квитанция.

Иминиятләштермичә йөреп булачакмы?

ОСАГО полисыннан башка хәрәкәт итәргә ярамый — моның өчен КоАПның 12.37.2 маддәсе буенча 800 сум күләмендә штраф салыначак. Шул ук вакытта, әгәр милекче ЮХИДИга килмәсә, автомобильне теркәү мөмкин булмаячак. Ягъни полистан башка теркәүне тормышка ашыруның бердәнбер легаль ысулы — машинаны ЮХИДИга эвакуаторда китерү, ә аннары аны стоянкага илтү.

Тагын нәрсәләр үзгәрәчәк?

Автомобиль исәпкә куелганда ОСАГО полисын мәҗбүри документлар исемлегеннән төшереп калдыру — закондагы бердәнбер үзгәреш түгел.

Хәзергедән аермалы буларак, 10 көн көтмичә машинаны учеттан төшерергә мөмкин булачак. Ул очракта сату-алу килешүен дәүләт хезмәтләре сайты аша төзергә яки нотариуста расларга кирәк булачак. Шулай ук, машина урланган очракта теркәлүне шундук туктатырга мөмкин булачак.

Бу элекке хуҗага автомобильнең яңа хуҗасы кылган хокук бозулар өчен штрафлар килмәсен өчен мөһим булып тора. Шулай ук, бу чорда транспорт салымын түләргә дә туры килмәячәк.