“БДБ Халыкара кубогы” ярышларында якташыбыз икенче урында

Сентябрь ахырында узган әлеге ярышларга 140 тан артык атлы спортчы килгән. Алар арасында Татарстан, Башкортстан, Кабардино - Балкар, Карачаево - Черкесск республикаларыннан, Мәскәү шәһәреннән, Төмән, Пенза, Пермь өлкәләреннән иң җитез һәм иң тәҗрибәле жокей катнашты."Ярышлар иртәнге биштә үк башланды. 14 ат 80 километрлы арага старт алды. Аннан соң 16 ат 40 километрга һәм өч ат 30 чакрымлы дистанциягә чыкты. Атларны ветеринария табиблары тикшерде. Аларның йөрәк тибеше, физик халәте контрольгә алынды. Күрсәткечләре нормага туры килмәгән атларны ярыштан төшереп калдыралар. Россиянең ат спорты федерациясе хөкемдарлары үз вазыйфаларын таләпчән башкаралар. Татарстан Республикасы Премьер-министры урынбасары Васил Шәйхразиев үзе дә җайдак буларак 40 чакрым араны уңышлы узды",- дип сөйли Сергей Ишмуков. Якташыбыз әлеге ярышларның 2400 һәм 2000 метрлы дистанцияләрендә чыгыш ясый һәм 2 - 3 урыннарны яулый, Мактау грамотасы һәм акчалата призлар белән бүләкләнә. Ат спортын яратучылар районыбыз спортчысын күреп тә, ишетеп тә беләләр. Төп эше буенча ул гадәттән тыш хәлләр службасында хезмәт итә. "Ат спорты белән мәктәптә икенче сыйныфны тәмамлагач шөгыльләнә башлаган идем. Шулай берчак колхозның товарлыклы - сөтчелек фермасы мөдире Владимир Кизин янына килдем дә, атка утыртып йөртүен үтендем. Володя абый үтә дә мәрхәмәтле кеше, мөрәҗәгатемне кире какмады. Ферма территориясендә рәхәтләнеп йөрдем, чаптырып та карадым. Шул минутларда мин үземне иң бәхетле кеше дип хис иттем. Мондый күнегүләрне еш кабатладым. Икенче елны (1983) авылда үткәрелгән Акатуйда колхоз атлары арасында узган ярышларда "Сынок" кушаматлы ат ббелән катнаштым. Әле дә хәтердә, стартка унбиш ат чыкты. Финишка беренче килүем миңа ниндидер этәргеч биргәндәй булды. Шуннан инде мин ат спортына кереп китүемне сизми дә калдым. Идел буе регионында узган күп ярышларда катнаштым, призлы урыннар яулаган еллар да булды. Спортта җиңүгә ирешү өчен даими шөгыльләнергә кирәк. Арчада яулаган урыннар белән бик үк канәгать түгелмен. Ни эшлисең, әле бөтенесе дә алда, "Сокол" белән "Самат"ым гына сынатмасын, яңа җиңүләр һичшиксез яуланыр",- дип сөйли Сергей Ишмуков.