Яңа Кәкерледә авыл тарихын барлаган китап презентацияләделәр

Бәйрәмне исә авылдашлары өчен Мәскәү шәһәрендә үз эшләрен булдырган Җәмил, Рәдис Хәйруллин,Иршат, Фәргать Алиуллин, Илгиз Асадуллин, Илһам, Азат, Илсур Сафиннар оештырганнар. Яңа Кәкерле ул сәнгать мәйданына Илсаф, Айрат Җамалтдинов кебек артистларны биргән як та. Алар да иҗатташ дуслары: Илсөя Бәдретдинова, Илфак Шиһапов һәм башкаларны алып кайтканнар иде бәйрәмгә. Бәйрәм башланыр алдыннан, иртән, дүрт корбан чалынды. Аның ите һәм шулпасы, тәм-томнардан өлкәннәр авыз итте. Көннең икенче яртысында исә мәйданда бала-чага, яшь җилкенчәк тә, өлкәннәр дә мәш килде. Уеннарның нинди генә төре, бүләкләрнең дә ниндие генә юк. Кул көрәштерүдә, аркан тартышуда, штанга күтәрүдә, капчык киеп йөгерү, чүлмәк вату кебек уеннарда яңакәкерлеләр, башка авыллардан килгән кунаклар өчен дә бер үк шартлар тудырылган иде. Ә менә көрәшкә аерым бер кагыйдәләр кертелде. Билгеле, бу да зур суыткыч кебек бүләкләрнең авылдашлар өлешенә тисен өчен эшләнде. Һәм абсолют батыр исеменә лаек булган Илгиз Асадуллин тәкә белән шундый бер зур бүләкне алды да.

Яңакәкерлеләр әле моның белән генә чикләнеп калмыйча, "Борынгы Яңа Кәкерле" дигән китап та нәшер иткәннәр. Бу китапның төп иганәчесе һәм оештыручысы ИлСаф булган диделәр. 500 экземплярда нәшер ителгән китапны ул үзе дә сатып алган. Чөнки сатудан тупланган акча да авыл зираты янын төзекләндерүгә тотылачак икән. Мондый саваплы гамәлне куәтләп, авылдашлар китапны сатып алып та бетергәннәр. Тагын сораучылар булса, авыл турындагы китап яңадан бастырылачак, дип аңлаттылар.

Билгеле, авылда да мондый җәмгыяви эшләрне башлап йөрүчеләр булмаса, читтән торып кына күркәм бәйрәмне кеше күңеленә хуш килерлек итеп оештыра алмас идең. Бу уңайдан бәйрәмдә мәктәп коллективына, аның җитәкчесе Шамил Абдрахманов һәм аның улына карата рәхмәт сүзләре әйтелде. Кичен бәйрәм салюты атылды, күктәге болытлар да күркәм мәҗлесне шифалы яңгыр тамчылары белән сәламләде.

Миңсылу Исхакова:

-Авыл бик якын шул. Яшел Үзән районында яшибез. Балалар, әйдә, дигәч җилкенеп кайттым. Туганнар, дуслар белән күрешү үзе бер гомер бит ул!