Марс авыл җирлегендә Бөек Җиңүнең юбилей медальләрен тапшыру тантанасы узды

Район Башкарма комитеты җитәкчесе Шәүкәт Алиуллов тантанага килгән сугыш һәм тыл ветераннарын якынлашып килүче 9 май-Җиңү бәйрәме белән тәбрикләде. Дәһшәтле елларда олы хезмәтләре һәм батырлыклары өчен рәхмәтләрен белдерде, хәерле гомерләр теләде.

-Сезнең чорга туры килгән сугыш-кешелек тарихында иң коточкычы. Шулай да сез аны гомерегез бәрабәренә уздыгыз, илебез азатлыгын яклап, аны саклап кала алдыгыз. Бүгенге көндә без, яшь буын сезнең тормышта бернигә дә мохтанмый яшәвегезне тәэмин итәргә, ил батырларыбызның каһарманлыгын онытмаска тиешбез,-диде Шәүкәт Алиуллов.

Татар Бизнәсе башлангыч һәм Марс урта мәктәбе укучылары тантанага үзләренең җыр-биюләре, шигырьләре белән ямь өстәделәр.

Чарага килә алмаучыларны район башкарма комитеты җитәкчесе өйләренә барып котлады. Татар Бизнәсендә сугыш ветеранының тормыш иптәше Маһирә апа Айнетуллова янында булып, тормыш-көнкүреше белән танышты. Маһирә апага 83 яшь, ул тормыш иптәше Летфулла белән тугыз бала үстергән, бүген аларның алтысы исән. Шулай ук, Шәүкәт Алиуллов тыл хезмәтчәне Шәмсеруй Садиева янында да булып дәүләт бүләген тапшырды.

Кадир Калимуллин, тыл хезмәтчәне:

-Мин беренче медалемне Бөек Җиңүнең 45 еллыгы өчен алдым. Шуннан бирле һәр юбилей медале белән хөкүмәтебез котлый, рәхмәт,-ди. Аңа бүген 85 яшь. 55 ел гомерен колхозда эшләүгә багышлаган. "Бүген яшәргә дә әйбәт, бар да бар, тик саулык кына бетте", ди уфтанып.

Марс авыл җирлеге буенча исән имин өч сугыш ветераны көн күрә. Шуның икесе Каракитә авылында. Югары Каракитәдә гомер кичерүче Адельҗан Мифтахов өендә дә булып, район Башкарма комитеты җитәкчесе юбилей медален тапшырды һәм озын гомер теләде. Аңа каршы ветеран:"Әйе, безгә сугыш кайта алмаганнар өчен дә яшәргә кирәк әле",-диде.

Тыл хезмәтчәне Гөлҗиһан Азизова да сугыш елларын күз яшьләре аралаш искә ала. Ачлык, ялангачлык, барысында күргән шул әлеге буын. Шулай да Җиңүгә ышаныч көчле була, ул дошманны җиңәргә ярдәм итә. Бүгенге буынга Гөлҗиһан апа илебезнең лаеклы шәхесләре булып үсүләрен тели, башка сугышлар кабатланмасын иде, -ди.

Тантанада Чүпрәле тармакара технологияләр техникумы директоры Рамиль Әхмәтов та катнашты. Соңгы елларда алар карамагында булган Югары Каракитә авылында яшәүче сугыш ветераны Җиһанша Исхаковның тормыш-көнкүреше белән даими кызыксынып, бәйрәмнәргә килеп йөри техникум дирекциясе. Бүген дә барлык өлкәннәргә Рамиль Әхмәтов исәнлек, тыныч көннәр теләде, бәйрәм белән котлады.