Машина йөртүчеләр яңадан имтихан тапшыра

Бигрәк тә правадан колак кагучыларны борчу басты. Бу хакта автоинспекциянең пропаганда буенча инспекторы Айрат Хуҗиев түбәндәгеләрне сөйләде:

-Агымдагы елның 1 сентябренә кадәр автотранспорт йөртү хокукыннан мәхрүм ителүчеләр, срогы җитеп праваны алган вакытта юл йөрү кагыйдәләрен белү-белмәү турында имтихан бирмәячәкләр. Ә менә 1 сентябрьдән соң мондый имтихан бирү мәҗбүри булачак. Һәм шуның өстенә медицина комиссиясен дә үтәргә туры киләчәк. Сүз уңаенда, юл йөрү кагыйдәләрен бозып штрафка тартылган һәм аны үзвакытында түләмәүчеләргә дә әйтер сүзем бар. Бүгенге көндә шундый 16 кеше исәптә тора. Штраф белән шаярырга ярамаганлыгын белсәләр дә, моңа бик битараф карыйлар.