Алькино ялне ӗçлӗ çулçӳрев

Ӗçлӗ çулçӳревӗн тӗп тӗллевӗ – ялта пурăнакансен килти хушма хуҫалӑхӗсен аталанăвӗпе паллашассиччӗ.

Алькино ялне ӗçлӗ çулçӳрев  кайни ӑнсӑртран пулмарӗ.  Пӗрремӗшӗнчен, кунта тутарсем пурӑнаҫҫӗ, иккӗмӗшӗнчен, ял халăхӗ тавар производствине ансат пулман форматра аталантарас енӗпе уникаллă опыт пухнӑ. Вӗсем колхозсем саланнӑ хыҫҫӑн, килти хушма хуҫалӑхсене аталантараççӗ  – пахчаҫимӗҫ ӳстерессипе интересленме пуçлаççӗ тата çак тӗлӗшпе малта пыракан позицисене те çӗнсе илме пултарнӑ.

Ял тăрăхӗн пуçлăхӗ Идрис Муллабаев каласа панă тăрăх, Алькино – Самара облаҫӗнчи чи пысăк тутар ялӗсенчен пӗри, унта ҫулталӑкӗпех помидорпа хӑяр ӳстереҫҫӗ.

Ялта 2000 яхӑн ҫын пурӑнать. 700 кил шутланать, 4 мечӗтпе медресе, ялти Культура çурчӗ, çавӑн пекех вӑтам шкул, ача сачӗ пур. Шкула 200 яхӑн вӗренекен, ача садне 60 ача ҫӳрет. Ялта унăн историне çутатакан питӗ пуян музей те ӗçлет. Библиотеки те пур, унӑн фондӗнче 15 пин экземпляр кӗнеке шутланать.

Район делегацийӗн составӗнче вырӑнти предпринимательсем, хресчен-фермер хуçалăхӗсен ертӳçисем, ял тăрăхӗсен пуҫлӑхӗсем те пурччӗ. Вӗсенчен пурне те Алькино ялӗн опычӗ интереслентерчӗ.  Пахчаçимӗç кăна мар, ялта выльӑх-чӗрлӗх ӗрчетес ӗҫ-хӗл те манăçа тухман, ӳсентӑран ҫӑвӗ те туса илеççӗ.

Чи пысӑк хресчен-фермер хуçалăхӗсен пӗри – Камиль Исхаковăн хуçалăхӗ. Вăл уй-хир ӗçӗпе тата выльӑх-чӗрлӗх ӗрчетессипе интересленет. Ăратлă лашисемпе те чапа тухнӑ.

Ӗҫлӗ çулçӳрев вӗҫленӗ май Çӗпрел çыннисем Самара облаҫӗнчи Челно-Вершины ялӗнчи завода та ҫитсе курчӗç. Завод ӗне сумалли аппаратсем, вакуум установкисем, насуссем, сӗт пăрăхӗсем, выльӑх-чӗрлӗх фермисем валли оборудованисем, запас чаçӗсем, комплектлакан хатӗрсем тата ыттине те туса кӑларать.

Пирӗннисем завод ертӳçипе пӗрле вӗсен продукцине суту-илӳ тăвас енӗпе пӗрле ӗçлес ыйтусене сӳтсе яврӗç.

Алькино ял халăхӗн историйӗ, пурнăçӗ, традицийӗсем ҫинчен хаҫатӑн çитес номерӗнче туллинрех çырăпăр.