Юмах хумӗсем тӑрӑх...

 «Талантсен планети» ачасен творчество çуртӗнче «Юмах хумӗсем тăрăх»  тесе ят панă мастер-класа хушма пӗлӳ паракан педагог, «Эпӗ пултаратӑп»  кружок ертӳҫи Ирина Борисова ирттерчӗ.

Çак мероприятире, ҫавӑн пекех, район пуҫлӑхӗ Марат Гафаров, районти ҫамрӑксен ӗçӗсем, спорт тата туризм уйрăмӗн ертӳçи Руслан Вильданов, ачасен пултарулăх çурчӗн педагогӗсем хутшӑнчӗҫ. Ачасен пултарулӑх çуртӗнче «Эпӗ пултаратӑп» кружок икӗ çултанпа ӗҫлесе тăрать. Уроксене кунта эрнере икӗ хутчен, кӗҫнерникун тата эрнекун ирттереҫҫӗ. Ирина Борисова ертсе пыракан çак кружокра майӗсем чикӗленнӗ ачасем çӳреҫҫӗ.

Ҫав кун ачасем мастер-класа кам-тăр ашшӗпе, хӑш-пӗрисем амӑшӗпе килнӗччӗ. Çак мероприяти вăхăтӗнче вӗсем пӳрт-теремок тата чӗре форминче ытти теттесем турӗç, ячӗсем пӗр, иккӗ е виҫӗ сăнартан е цифрӑсенчен пулнă юмахсене аса илчӗҫ, алă тата пӳрнесемшӗн  гимнастика турӗҫ, хутсене хачӑпа касрӗç, тӗрлӗ тӗссемпе сӑрларӗç, çыпăçтарчӗç. Ачасемпе пӗрле вӗсен ашшӗ-амӑшӗсем те заданисене пурнӑҫларӗç. Мастер-класс пынă вăхăтра ачасем Хӗл Мучи патне ҫыру та ҫырчӗҫ, унта вӗсем хӑйсем  тата хӑйсен ырӑ сӗнӗвӗсем ҫинчен пӗлтерчӗç. Ҫырăвӗсене вӗсем, Хӗл Мучи валли тесе, Марат Гафарова пачӗç.

Вăл вара çакăн пек урок-уяв вӗçленес умӗн  ачасене парнесем пачӗ тата мӗнпур ашшӗ-амӑшӗсене  тав турӗ,  пурне те сапăрлăх, сывлӑх, ҫитӗнӳсем сунчӗ.

Кивӗ Чукал ялӗнчен Ильсаф Мустафин ашшӗпе Ильмаспа килнӗччӗ.

Ильмас Мустафин:

– Ильсаф ӳкерчӗк тума юратать, килти условисенче 8-мӗш класра пӗлӳ илет. Акӑ ҫакӑн пек мероприятисене, больницӑра пулман вăхăтра, килме тăрăшатпăр. Ачашăн хăйпе пӗр çулхисемпе хутшăнма пулнă майсем те вӗт çакă. Пӗр-пӗринпе паллашаççӗ, калаçаççӗ, таврăнсан та амăшне мӗн пулнине, мӗн курнине, мӗн тунисене каласа парать Ильсаф. Район пуҫлӑхне, районти çутӗç пайне, ачасен творчество çурчӗн ертӳçине, ӗҫченӗсене те тав тăватăп. Малашне те ҫакӑн пек мероприятисем ирттерсе тăччăр, ачасем кунтан хавас кӑмӑлпа килӗсене таврăнаççӗ, тесе калас килет.