Вӗçсӗр юмах

Кушакпа йытӑ урама уçӑлма тухрӗç тет. Кушак йытӑ çине  сикрӗ те сӑмсине чӗрсе илчӗ. Йытӑ нӑйкӑшса килнелле чупрӗ тет. Хирӗç çынсем килеççӗ тет.

– Йытӑ, йытӑ! Мӗншӗн нӑйкӑшатӑн? – тесе ыйтаççӗ унран.

– Мӗншӗн нӑйкӑшас мар-ха манӑн? Кушак манӑн сӑмсана чӗрсе илчӗ, - тет йытӑ.

– Кушак, кушак! Йытӑ сӑмсине мӗншӗн чӗртӗн эсӗ? – тесе ыйтаççӗ çынсем.

– Мана хурсем хӑратрӗç, – тет кушакӗ.

– Хурсем, хурсем! Мӗншӗн кушака хӑратрӑр? – теççӗ çынсем.

– Пире хуçа майри шыв ӗçтермерӗ, – теççӗ хурсем.

– Хуçа майри, хуçа майри! Хурсене мӗншӗн шыв ӗçтермерӗн? – тесе ыйтаççӗ çынсем.

– Ман пусӑра шыв пӗтрӗ, – тет хуçа майри.

Полина Унискова.

Пыл юмахӗ

Пӗррехинче кашкӑрпа упа йывӑç çине хӑпарчӗç те тимлӗн пӑхса лараççӗ тет. Ларсан-ларсан упа савӑнӑçлӑн мӗкӗрсе ячӗ тет: «Вӗлле хурт йӑвине тупрӑм, часах пыл çийӗпӗр!» Унтан вӗсем йывӑç çинчен васкаса анчӗç тет. Ансанах пыл чӗресне йӑтнӑ тилле тӗл пулчӗç тет.

 – Тилӗ, тилӗ, ӑçтан çав тери нумай пыл тупрӑн? – тесе ыйтаççӗ упапа кашкӑр.

– Çывӑхри йывӑç çинчен илтӗм, – тет тилӗ тус.

– Сана кам илме каларӗ? – теççӗ лешсем.

– Мана пакша илме каларӗ, – тет тилӗ.

Вара упапа кашкӑр пакша патне çул тытрӗç. Часах вӗсем пакша патне те çитрӗç.

– Пакша, пакша, эсӗ мӗншӗн тилле пирӗн пыла илме каларӑн? – теççӗ упапа кашкӑр.

– Мана шӑши пыл илме хушрӗ, – тет пакша.

Часах упапа кашкӑр шӑши патне те çитрӗç тет.

– Шӑши, шӑши, мӗншӗн пакшана пирӗн пыла илме каларӑн? – теççӗ лешсем.

– Ман çиес килчӗ, – тет шӑши.

  Фёдор Унисков.