Ҫӗпрел ҫыннисем «Агроволга – 2022» курава хутшӑнчӗç

Курав экспозицийӗнче Раҫҫей Федерацийӗн 40 регионӗнчен 400 ытла компани, Раҫҫейӗн мӗнпур регионӗсенчен тата ытти ҫӗршывсенчен 15 пинрен ытла агропромышленность отраслӗн ертӳҫисем, ҫавӑн пекех, Ҫӗпрел районӗн делегацийӗ те хутшӑнчӗ.

«Тăваньел пахчисем» обществӑн ертӳҫи Альфред Хайруллин хӑйӗн анлă продукцине сӗнчӗ. «Цильна» хуҫалӑхӗ республикӑри ӑратлӑ тынасен конкурсӗнче хутшӑнчӗ. Курав пынӑ май чи лайӑх ветеринар-ортопедсене, ҫавӑн пекех, механизаторсен професси ӑсталӑхӗсене палӑртрӗҫ. «Трактор-шоу» регионсем хушшинчи ӑмӑртусенче тракторпа çӳрес ăсталăхне «Рассвет Агро-Çӗпрел» хуҫалӑхăн механизаторӗ В.В.Лепешкин кăтартрӗ тата 40 ҫын хушшинче 17 вырӑна тивӗçлӗ пулчӗ.

«Агроволга – 2022» курав шайӗнче пӗчӗк формӑллӑ хуҫалӑхсене аталантарас енӗпе республикӑри грант программисен ҫӗнтерӳҫисене сертификатсем те пачӗç. Пирӗн районтан çак грант пулӑшӑвӗн сертификачӗсене фермерсем: Динар Низамов, Алмаз Низамов тата Марс Хайрутдинов илчӗҫ.