Ҫамрӑклӑх тунсăхлаттарать

Эпӗ час-часах Совет Ҫарӗнче службӑра пулнӑ ҫулсене аса илетӗп. Казахстан ҫар округне кӗнӗ Державинск хулинче вырнаçнă  ракета ҫарӗнче знаменоносец пултăм эпӗ. Ҫакӑн пек чыслӑ тивӗҫе малтан мӗнле хатӗрленине çар службине иртнӗ çын пӗлет пулӗ.

Чаҫре 30 пине яхӑн салтакпа офицер. Вӗсен хушшинчен мана ялав йăтса пыракан  пулма суйласа илни те пысӑк яваплӑх пулса тăчӗ. Пите хӗретес марччӗ,  тесе тӑрӑшрăм, паллах. Кашни задание, салтак умне лартнӑ çар тивӗçне чыслӑн пурнӑҫларăм. Взводӑн хуҫалӑх командирӗ пултӑм.

Çар службинче илнӗ хӑнӑхусем – ума лартнӑ задачӑна пысӑк яваплӑхпа пурнӑҫлани мана пурнăçра та питӗ çирӗп пулăшрӗç. Нумай ҫулсем хушши районта газ эксплуатаци службин начальникӗ пулса ӗҫлерӗм, ялсене газ кӗртрӗмӗр, газ баллонӗсене кӳртереттӗмӗр, тата темӗн тӗрлӗ ӗçсем те пурнăçларӑмӑр –  ӗçӗме кура ҫынсенчен те, ертӳçӗсенчен те тав сӑмахӗсемсӗр пуçне ытти сăмах  илтмерӗм.

Халӗ акă тивӗçлӗ канура ӗнтӗ эпӗ. Çынсемпе, район ҫыннисемпе пӗрле, хам лартнӑ хырсемпе чӑрӑшсене, пахчана пӑхса ирттеретӗп кунсене. Районти ҫӗнӗлӗхсемпе паллашса пыратăп, лайӑх енне улшӑннӑшӑн чунтан савӑнатӑп. Пурне те сывлӑх сунатӑп.

Амир Шарафутдинов, Кивӗ Çӗпрел ялӗ.