Чүпрәле делегациясе Удмуртиядә "Мир" предприятиесендә булып кайтты

Бүген район башлыгы Марат Гафаров җитәкчелегендәге Чүпрәле районы делегациясе Удмуртиядә "Мир" ҖЧҖ һәм Татарстан Республикасы Алабуга районы территориясендәге  терлекчелек комплексларында булды. Бу хакта район башлыгы Instagram битендә хәбәр итә.
"Терлекчелекне үстерү-безнең өчен мөһим бурычларның берсе",-дип язган Марат Ринатович. 
Чүпрәле фермерлары комплексларның эш үзенчәлекләре һәм хуҗалыкның уңышлы үсеше нечкәлекләре белән таныштылар. Сәфәр "ТР ССП" берлеге тарафыннан оештырылды.
«Мир» ҖЧҖ үз эшчәнлеген Удмуртия Республикасының Воткино районы «Кукуевское» муниципаль берәмлек территориясендә 2006 елдан бирле алып бара. Хуҗалыкның төп юнәлеше-сөт терлекчелеге. Шулай ук игенчелек белән дә уңышлы шөгыльләнә.
«Мир» ҖЧҖ генераль директоры Елена Николаевна Собина авыл хуҗалыгы өлкәсендә 2015, 2016, 2017 һәм 2018 елларда иң яхшы инвестор дип табылган.