Чүпрәледә "Акчарлак" балалар сәламәтләндерү лагерын ачу тантанасы узды

Чүпрәле районы җитәкчеләренең үзләренең дә шунда ял иткәннәре булганмы, әллә заманча яшәү принципларыннан, туган ягыбызны таныту, киләчәктә инвесторлар җәлеп итү, туристик сәяхәтләр оештыруны күздә тотыпмыдыр, лагерьны яңарту эшен җирле бюджет хисабына башлап җибәргәннәр иде. Аерым алганда, район башлыгы Александр Шадриков инициативасын Татарстан республикасы Президенты Рөстәм Миңнеханов та күтәреп алды. Башланган эшкә республика бюджетыннан саллы ук сумма бүлеп бирелде. Юкка гына Татарстанга кайбер өлкәләр көнләшеп, кайберәүләр сокланып карамый. Республикада булдырылган төрле прогрпммалар хисабына лагерьның тирә-юне дә танымаслык булып үзгәрде. Элеккеге буа урынына заманча плотина, ярларында комлык булдырылды. Теннис кортлары, бассейннар, спортмәйданчыклары урын алды территориядә. Төрле оешма җитәкчеләре дә моннан чит калмады әлбәттә, балалар өчен дигәч, алар үз бүләкләрен китерде, ә раондашлар чистарту-агарту эшләренә тартылды. Шундый күмәкләшеп эшли белүебез тормышыбыздан юкка чыкмаса иде!

Бүген лагерьны ачу тантанасында, ТР Премьер-министр урынбасары, мәгариф һәм фән министры Энгель Фәттахов, шулай ук, республика министрлыкларыннан вәкилләр дә катнашты.

Район башлыгы Александр Шадриков республика җитәкчелегенә, Президентка олы рәхмәт сүзләрен белдерде. Әлеге бинаның чын мәгънәсендә Чүпрәле балалары өчен зур бүләк икәнлеген әйтте. Шулай ук кыска гына вакыт эчендә шушы мәһабәт биналарны, инфраструктурасын төзү, булдыруга лаеклы өлеш керткән Энергосервис", "Созидание", "Сетевая компания", "Тепловик", "Фламинго", газлаштыру фонды, "Татмелиорация", "Татавтодор", "Таттелеком", "Ленгесов", "Марков", "Бикмухамедов" ширкәтләренә дә ихлас рәхмәтен җиткерде.

Республика Мәгариф һәм фән министры Энгель Фәттахов:

-Республикада соңгы елларда яңа мәктәп, балалар бакчалары ачылды. Ә мондый биналар әлегә берәмтекләп кенә төзелде. Аның сафка басуы мәгариф өлкәсендә дә зур уңыш. Биредә чүпрәлеләр генә түгел, күрше район балалары да килеп ял итәрләр, сәламәтлекләрен ныгытырлар. Әлбәттә, укучыларның республика һәм Россия күләмендәге олимпиадаларда да уңышлар яулавын күрәсе килә. Мондый мөмкинлекләр әлеге юнәлештә үз нәтиҗәсен бирер дип ышанам.

Тантанада яңа лагерьны сафка бастыруда зур өлеш керткән төзүче оешмага, хезмәткәрләргә рәхмәт хатлары тапшырылды. килде. Бу күңелле вакыйгага кадәр үк инде яңа лагерь ял итүче хуҗаларын - балаларны кабул иткән иде. Беренче смена анда 6 июньдә эшли башлады.