Чүпрәледә өченче “Троица көйләре” фестивале үтәчәк

Әлеге фестивальне  үткәрү районда традициягә әйләнде  һәм быел ул төбәкара статуска ия булды. Икенче төрле әйтсәк, фестиваль Татарстан Республикасында үткәрелүче  мәдәни чаралар исемлегенә кертелде.

Чараның географик масштабы елдан-ел киңәя бара. Идел буе зонасына кергән районнардагы фольклор ансамбльләрдән тыш, быел Ульяновск өлкәсеннән, Чувашия Республикасыннан да коллективларның килүе көтелә. Шуны да әйтәсе килә, программада тынлы музыка әсәрләре, милли халык, патриотик  җырлар да урын алачак, шулай ук, биюләр дә булачак.

Сергий  Радонежский храмы башлыгы, иерей Павел  Пурлов әйтүенчә, “Троица көйләре” фестивале – ул гореф-гадәтләребезне яңарту. Элек тә, халкыбыз табигатькә чыгып, төрле чаралар үткәргән бит.

Моннан тыш, фестиваль барышында төрле мастер-класслар тәкъдим ителәчәк, мәйданчыкта сувенирлар сатылачак. 

Райондашларыбызны иң матур бәйрәмнәрнең берсе булган әлеге фестивальдә,  Сергий  Радонежский храмы территориясендә, 2 июньдә, 11.00 сәгатьтә көтеп калабыз. 6+