8 июль-Россия почтасы көне. Бу көн 1994 елдан бирле, июльнең икенче якшәмбесендә билгеләп үтелә.
Почта хезмәтенең әһәмиятен үз вакытында Петр I таныган. Бүген дә хат ташучыларның дәрәҗәсе югары. Статистика мәгълүматла-рына караганда, почта хезмәткәрләре елына 1 миллиард хат, 3 миллиард басма, 12 миллион посылка, 44 миллион сум акча тапшыра. Почтаны 450 вагон, 17 мең машина һәм 360 очкычта күчерәләр.
Бәйрәм уңаеннан район почтамты начальнигы Назыйм Нәфиевка мөрәҗәгать итеп, бүгенге почта хезмәтенең эшчәнлеге хакында сөйләштек.
-Бүгенге почта хезмәте күпкә җиңеләйде. Халык ихтыяҗларын канәгатьләндерү өлкә-сенә юнәлдерелгән хезмәтләребез электрон рәвештә алып барыла, барлык төр коммуналь түләүләр кабул ителә, почта аша кайтарылучы товарлар дистанцион сату аша башкарыла. Шулай ук, авиа һәм тимер юл билетларын ташламалы тарифлар белән тәкъдим итәбез. Әлеге хезмәт шулай ук, интернет аша башкарыла. Теләүчеләр юл өчен акча түгеп, кайдадыр барып билетлар алганчы, аны безнең аша эшли алалар.
Бүгенге район почта бүлекчәләрендә дә эш тәртибе электрон бер база системасына салынган, бу исә эшне алып баруда тагын да җайлылык тудыра.
Бәйрәм уңаеннан 15 ел почта өлкәсендә хезмәт итеп, үзебездән лаеклы ялга киткән ветераннарыбызга акчалата бүләкләр әзерләдек. Шулай ук, үз хезмәтләрен намуслы башкарган, гомере буе хезмәтебезгә тугрылык саклаган хезмәткәрләребез: Фирдәүсә Нигъманова, Шәйхетдин Туктамышов, Зөлфия Камалова, Дилүзә Шәяхмәтова, Гөлнур Мөдәррисова, Нина Кузнецова, Рамилә Хәсәнова Россия һәм Татарстан почтасы җитәкчесе тарафыннан Мактау Грамоталары һәм Рәхмәт Хатлары белән бүләкләнделәр.
Коллективыбыз бердәм, тату, бер-беребезне аңлашып эшләргә тырышабыз. Ел дәвамында Абунәче көне, төрле акцияләр үткәрелеп тора, һәркем анда актив катнаша. Әлеге уңайдан 2012 елның икенче яртыеллыгына газета-журналларга яздыруны уңышлы гына төгәлләдек дип була.
Бәйрәм уңаеннан хезмәт-кәрләребезгә исәнлек, бәхет, бердәм булып, авырлыкларны җиңеп эшләвебезне теләп калам.
