Район коткаручылары 27 мәртәбә янгынга, 52 тапкыр юл-транспорт һәлакәтенә чыккан

-Василий Евгеньевич, үзегезнең эшегез, коткаручыларның нинди булырга тиешлеге хакында сөйләгез әле,,,

-Бүген бездә 40 кеше эшли. Коткаручы булып физик яктан нык, кулы эш белгән, таза, чыдам егетләр генә эшли ала. Чөнки хезмәтебез бик җаваплы, шул ук вакытта куркыныч та. Янгын белән көрәшү, язгы ташу вакытында бик еш сыналырга туры килә. Быелның 2-3 апрель көннәрендә Татар Шатрашаны авылында су кинәттән 60 сантиметрга күтәрелде. Хезмәткәрләребез тәүлек буе кизү торды, көймәләр ярдәмендә халыкны азык-төлек һәм дарулар белән тәэмин иттек. Мунчәли авылы кибете сатучысы Мәүлидә Сатдинова язгы ташу вакытында безнең белән һәрчак элемтәдә тора. Аңа һәм авылын уйлап яшәүче шундый кешеләргә ихлас рәхмәт.

Юлларда булган аварияләргә дә чыгабыз. Быел шундый "ДТП"га 52 мәртәбә бардык. Мондый чакта тимер-томыр арасында калган кешеләрне коткару өчен кирәкле коралларыбыз бар. Тиз арада тимерне дә кисәбез, күтәрәбез дә. Эшебез буенча даими булып торган укулар, өйрәнүләр шуңа юнәлтелгән.

Яшел Үзән шәһәрендә безнең уку-өйрәнү үзәгебез бар. Барлык хезмәткәрләребез шунда үзләренең һөнәрләрен камилләштерә. Гадәттән тыш хәлләр зонасындагы фаҗигаләрдә кешеләрне коткару буенча 11 төр сертификатыбыз бар.

-Василий Евгеньевич, районны янгыннардан саклау да төп эшегез булып тора. Бу хакта ни әйтер идегез?

-Быел 27 урындагы янгынга чыктык. Аларның күп өлеше шәхси хуҗалыкларга туры килә. Ут белән саксыз эш итү, электр үткәргечләре һәм приборлары төзек булмау яки аларны утка ялгаган килеш онытып калдыру нәтиҗәсендә янгыннар еш була. Вакытында хәбәр итсәләр, су алу урыннары, юллары булса, утка җәелергә ирек бирмибез, тиз сүндерәбез. Борындык элеваторында 5-6 катлы йорт биеклегендәге янгын бик куркыныч иде. Анда көнбагыш орлыклары янды.

-Эш барышында үзен уңай яктан күрсәткән һәм беркайчан да сынатмаган коткаручыларыгыз да бардыр?

-Безнең егетләребезнең барысы да бөркет кебекләр. Иван Годунов, Айрат Әюпов, Рамил Гафуров, Вячеслав Шәрәфетдинов, Юрий Федоров һәм башкалар югалып, каушап кала торган егетләр түгел, иң авыр хәлдә дә җиңеп чыгарга тырышалар.

Ветераннарыбызга да ихлас күңелдән рәхмәт әйтәсем килә. Һәрдаим куркыныч янаган хезмәткә ирләрен озатып калган хатыннарга да сәламәтлек, сабырлык бирсен, Ходай.