Бакчада көрәннән (хрен) ничек котылырга?

"Бакчада көрәннән (хрен) ничек котылырга? Безнең бакчада нык үсеп китте, аны берничек тә бетерә алмыйбыз. (Тамыр системасы бик куәтле). Р.Галеева, Иске Чүпрәле авылы".

Газета укучыбызның әлеге соравына "Россельхозцентр” ФДБУнең Татарстан Республикасы филиалы әйдәүче агрономы Салават Галимҗанов җавап бирә.

- Көрән чыннан да иң тере үсемлекләрнең берсе булып тора, һәм аның куәтле тамыр системасы участоктагы башка культураларны кысрыклап чыгарырга сәләтле. Әмма проблемага системалы якын килсәң, аны хәл итәргә мөмкин.

Механик рәвештә бетерү

Иң нәтиҗәле, әмма күп көч таләп итә торган ысул — тамыр казу. Тамыр системасының зарарлануын киметү өчен сәнәкләр кулланыгыз (көрәк еш кына тамырларны кисә, бу исә аларның алга таба үсүенә ярдәм итә генә). Туфрак дымлы һәм йомшак булганда, көзен яки иртә язда көрәнне казыгыз. Хәтта вак тамырчыкларның да алынганлыгына инаныгыз, чөнки алар яңа бәбәкләр бирә алалар.

Изоляция

Әгәр көрән зур булмаган участокта үсә икән, аны изоляцияләп карарга мөмкин. Җиргә 40-50 см тирәнлеккә шифердан, металл табаклардан яки тыгыз пластиктан киртәләр казыгыз. Бу тамырларның бакчаның башка өлешләренә таралуына юл куймаячак.

Химик чаралар

Механик ысуллар ярдәм итмәгән очракларда гербицидлар кулланырга мөмкин. Тамыр системасына тәэсир итүче глифосат нигезендә ясалган препаратларны (мәсәлән, Раундап һәм аның аналогларын) сайлагыз. Башка үсемлекләргә эләкмәсен өчен, аларны нокталы рәвештә көрән яфракларына сөртегез. Эшкәртүне үсемлекнең актив үсү чорында җилсез коры һавада башкару яхшырак.

Күләгәле урын булдыру

Көрән яктылыкны ярата, шуңа күрә аны кояш яктысыннан мәхрүм итәргә мөмкин. Көрән үскән участокны тыгыз материал (кара пленка, картон, рубероид) белән каплагыз һәм бөтен сезонга калдырыгыз. Яктылык кермәсә, үсемлек зәгыйфьләнә һәм һәлак була.

Контроль һәм профилактика

Хәтта көрәнне алганнан соң да участокны даими рәвештә яңа бәбәкләр булу-булмавын тикшереп торыгыз. Яшь шытымнарны вакытында алу үсемлеккә кире үсеш алырга ирек бирмәячәк.

Шулай ук, бакчага горчица, арыш, солы яки люцерна кебек сидератлар чәчүнең нәтиҗәсен дә билгеләп үтмичә булмый. Алар тиз үсә һәм куәтле тамыр системасын үстерә, шуның белән туклыклы матдәләр, су һәм яктылык өчен көрәнгә конкуренция тудыра. Сидератларны чәчәк атканчы чабарга һәм туфракка кертергә кирәк. Бу орлыклануны булдырмый калачак һәм көрәннең үсешен бастыру нәтиҗәсен көчәйтәчәк.