Штраф та тӳлӗн, «правасăр» та юлӑн

Ҫулталӑк пуҫланнӑранпа Ҫӗпрел районӗнче ӳсӗрле ҫӳренӗшӗн ултӑ ҫын тӗлӗшпе суд йышӑну кӑларнӑ.

Республикӑра, ҫав шутра районта та, спиртлă шӗвексем ӗҫсе, транспорт хатӗрӗпе çӳрекенсен шучӗ чакмасть. Чи хăрушши – вӗсем хутшӑннипе ҫул-йӗр инкекӗсем пулса иртни.

Чылай чухне ҫывӑх ҫыннисем е тӑванӗсем ӳсӗрле автомобиль ҫине ларнине кураҫҫӗ, анчах вӗсене чарас тесе нимӗн те тумаҫҫӗ.

– Ӳсӗр çынна транспорт хатӗрӗпе çӳреме чармалла. «Халӑх инспекторӗ» – питӗ пӗлтерӗшлӗ мероприяти. Ку ӳсӗр ҫын çинчен çăхав çырни мар, ҫын пурнӑҫне ҫӑлни, – тет ГИБДД пайӗн ертӳçи Анатолий Михайлов.

Вăл, çаплах, ӳсӗрле руль умне ларнăшăн 45 пин тенкӗ штраф тата водителе 1,5 ҫултан пуҫласа 2 ҫул таранччен правасӑр хӑварма пултарни çинчен те пӗлтерчӗ.

– Медицина тӗрӗслевӗнчен пӑрӑнас пулсан та, ҫавăн пекех яваплăх кӗтет. Ӳсӗрле транспорт хатӗрне тепӗр хут тытса пынă май лексен, 3 ҫул таран ирӗксӗр хӑварӗç.  Суд решенийӗпе килӗшӳллӗн айӑплă çыннăн транспорт хатӗрне конфискацилеме те пултараҫҫӗ. Пысӑк штраф тӳленисӗр пуҫне, вӗсем руль умне те часах лараймӗҫ, – тет полици майорӗ.