Кăмăллă кантăмăр

Районта   хӑтлӑлатнă «Приказ» кӳлли аслă çулсенчисен юратнӑ кану вырӑнӗ пулса тӑчӗ.

Ҫак кунсенче Раҫҫей пенсионерӗсен союзӗн вырӑнти уйрӑмӗ йӗркеленӗ кану каҫӗ каллех аслă ӑру представителӗсене пухрӗ.

Мероприятире район центрӗнчи пенсионерсем кӑна мар, ытти ялти аслă çулсенчи çынсем те хутшӑнчӗç. Ветерансем район тата республика шайӗнчи мӗнпур обществӑпа пӗлтерӗшлӗ мероприятисенче хастар хутшӑнни никамшăн та вăрттăнлăх мар. Çак мероприяти те ветерансен активлă пурнăç позицийӗн пӗри пулчӗ.

Уявра хутшӑнакансене Раççей Пенсионерӗсен союзӗн районти вырӑнти уйрӑмӗн ертӳҫи Дилюза Азизова, Социаллă фондăн Ҫӗпрел районӗнчи клиент службин ертӳçи Роза Гафарова тата районти ветерансен совечӗн ертӳҫин ҫумӗ Рустам Хамидуллин саламларӗҫ. Вӗсем аслă çулсенчисене  район пурнӑҫне хастар хутшӑннӑшӑн, чыслă ӗҫӗсемшӗн, пурнӑҫри пысӑк опытшӑн тав турӗҫ, сывлӑх, телей, вӑрӑм ӗмӗр сунчӗҫ.

Каç питӗ ӑшӑ атмосферăра иртрӗ. Районăн хисеплӗ çыннисем хӑйсен юратнӑ юррисене юрларӗç, ташларӗç, сӑмавартан техӗмлӗ чей ӗҫрӗç, пӗр-пӗринпе калаҫрӗç, çамрăклăх ҫулӗсене аса илчӗç.