Ӗçре те, юрăра та маттурсем

Çӗнӗ Упи ялӗнчи  ыр кăмăллă волонтерсем сетка çеç çыхмаççӗ, культура çурчӗнче иртекен концертсенче те хутшăнаççӗ. Нумаях пулмасть вӗсене сцена çинче курса савăнтăмăр. Кам-тăр   юрлас-ташлас енӗпе маттур, теприсем ал ӗçӗпе аппаланас енӗпе ăсталăх  кăтартаççӗ. Тивӗçлӗ канура пулин те чун киленӗçӗ тупаççӗ. 

Чи хастаррисем – Акă Ольга Сердцева, Валентина Савина, Зинаида Саймуллова – «Илем» фольклор ушкăнне кăмăлласа çӳреççӗ. Çăмрăксемпе пӗрле янравлă сассисемпе, юрăсем шăрантараççӗ, хӳхӗм ташă хусканăвӗсене пурнăçлаççӗ.

– Чун юрлас килнӗ чухне çӳресчӗ, çитӗнекен ăрăва авалхи йăлари юрăсемпе паллаштарасчӗ, – терӗç пӗр харăссăн. – Кичемленсе ларас килмест килте.

Ирина Ярзуткинан атлас хăйӗвӗнчен хатӗрленӗ тӗрлӗ картинисем, ҫекӗлпе ҫыхнӑ теттисем, юмахри сăнарсем пекех куçа илӗртеççӗ. Кашниех хăйне евӗрлӗ пулса тухнă.

– Ытларах хӗллехи каçсенче çыхатăп, хама та питӗ килӗшет, – терӗ Ирина Ярзуткина ӗçӗсемпе паллаштарса. – Чуна парса, хăвăн аллупа ӗçлени яланах çывăх.

Галина Ильина хутран пӗтӗрсе карçинккасем, тӗрлӗ калăпăшри савăтсем, арча ăсталать.

– Килте пӗртте те ахаль ларас килмест. Пушă вăхăт тупăнсанах, журналсенче тӗрлӗ япаласем тупса, усă курма тăрăшатăп, – тет Галина Спиридоновна. – Вăхăт  иртни те сисӗнмест. Алăсем те яланах хусканура. Тимлӗхе те ӳстерет. Хамăн ӗçӗмсенчен яланах киленӳ тупатăп. Ачасене, мăнуксене яла килсен кăтартатăп.

Концерта килнисем ялти ăстасен ӗçӗсем çине пăхса чылайччен  киленчӗç.