Çил тĕнчинче

Çил ачисем вылярĕç  каçхине,
Шăлса пуçтарчĕç юр пĕрчисене.
Хăш-пĕр ӳнерçисем пикенсе,
Тĕрлерĕç эрешсем кантăк çине.

Силлерĕç аслисем йывăçсене,
Хушрĕç  ваттисем çамрăксене:
– Кайса хускатăр пĕчĕк капансене,
Кĕрсе тухăр кăмака мăрьисене.

Шăхăрчĕç çил ачисем мăрьесенчен,
Алăка тĕксе пăхрĕç ӳркенменнисем.
Кантăкран вăрттăн сăнарĕç хăшĕсем,
Пӳрт кĕтесне кăтăкларĕç матуррисем.

Чупрĕç вайлисем чарăнмасăр уй-хирте,
Ывăнмасăр анса хăпарчĕç çырма-çатрасене.
Купаласа хучĕç айлăма юр пуххине,
Илемлетрĕç ĕçĕпе çут тĕнчене.

Акă, аслă çилĕ йыхăрчĕ пĕрне:
– Куратна эсĕ çав çурт картишне?
Тултар пĕр шеллемесĕр шур юрпа,
Çынсем ан вырччĕр кунĕпе пӳртре.

– Еçлетчĕр, – терĕ сухалне тытса,
– Ахаль те ухмаха тухаççĕ ĕç çукпа. 
Лараççĕ вĕтти-ватти телефон шăлса,
Выляма пĕлмеççĕ уçă сывлăшра.

Каларĕ вăл тата пуçне хыçса:
– Ĕлĕк аванччĕ çын ачипе ăмăртса чупма.
Çырмана анатчĕç ярăнма çунашкапа,
Ача-пăча сасси янратчĕ хăлхара.

Ши! Шăхăрчĕ аслă çилĕ йыхăрса,
Таврари ачисене васкавлăн пуçтарса:
– Çитет  пулĕ, ачасем, паянлăха,
Вай-халсене упрар малашлăха.
Петр Мулеев, воин-интернационалист, Çӗнӗ Йӗлмел ялӗ.