Атӑл хӗррине вӑрман турттарнӑ...

Ҫулсем иртнӗҫемӗн этем пурнӑҫ опытне, ӑслӑлӑх, таврари ҫынсен хисепне, тимлӗхне çӗнсе илет. Кивӗ Шемӗршел ялӗнче пурӑнакан Заудат Галиуллович çавӑн пек çынсенчен пӗри. 

Хӑйӗн пурнӑҫӗнчи пысăк та сумлă датăна — 90 çулхи юбилейне Заудат Галиуллович ял-йышпа, ачисемпе, мӑнукӗсемпе палăртса ирттерчӗ.

Ялăн ватă çынни иртнисене аса илсе, Кивӗ Шмӗршел ялӗнче пилӗк колхоз пулни çинчен каласа иртрӗ. «Ял пысӑк, ҫыннисем те нумай. Пилӗк колхоз кӗрлесе ӗçлерӗ. Унтан вӗсене бригадӑсем туса хӑварчӗҫ. Аттене вӑрҫа илмен, вӑл выльӑх-чӗрлӗх врачӗччӗ. Вӑл ҫак пилӗк колхозӑн выльӑх-чӗрлӗхне пӗччен пӑхрӗ, сыватрӗ», — тесе калаçрӗ ӗҫ ветеранӗ.

Ҫав тапхӑрта Заудат Галиулловичăн та ӗҫлӗ пурнӑҫа ир пуçăнма тӳрӗ килет. Колхозра ӗҫлеççӗ, ҫамрӑк каччăсем вӑрман касма каяççӗ.

— Вӑрман касса, йывӑҫсене утлӑ лавсем ҫине тиесе, Атӑл хӗррине турттарса тухаттăмăр, унтан вӗсене сулӑсем ҫине хурса, шывпа юхтарса яраттăмăр. Ку питӗ йывӑр ӗҫ пулчӗ, анчах эпир ӳпкелешмерӗмӗр, — терӗ юбиляр.

1961 ҫулта Фидия Халиулловнапа çемье çавăрса яраççӗ, 60 ҫул килӗштерсе пурăнса, пилӗк ача пӑхса ӳстереççӗ. Вӗсем пурте пӗлӳ илнӗ, тӗрлӗ хуласенче пурӑнаҫҫӗ, ӗҫлеҫҫӗ. Час-часах тӗп никӗсе таврӑнаҫҫӗ.

Кунта вӗсене ашшӗ-амӑшӗ, тӑванӗ Тальгат тата унӑн мӑшӑрӗ кӗтсе илеҫҫӗ.

Заудат Галиуллович виҫӗ теçетке ҫул хушшинче ислам аталанӑвне пысӑк пай кӗртнӗ ҫынсенчен пӗри. Аслă çулсенче пулин те, вӑл паян кунчченех кулленхи ӗҫре пулӑшать, канашсем парать.

90 ҫулти юбиляра саламлама район пуҫлӑхӗн ҫумӗ Алексей Ярухин тата ял тӑрӑхӗн пуҫлӑхӗ Ильгамия Мухитова килнӗччӗ. Парнесем пачӗç, ӑшӑ сунăмсем сунчӗç.

Справка

Кивӗ Шемӗршел ял тӑрӑхӗнче 90 ҫул урлă каçнă 27 çын пурăнать!