Чүпрәледә техника кышкы саклауга куелды

Район хуҗалыкларында авыл хуҗалыгы техникасын кышкы саклауга кую һәм ремонт эшләрен оештыру сыйфатын тикшерү буенча комиссия эшләде. Комиссия составына ТР Авыл хуҗалыгы һәм азык-төлек министрлыгының әйдәп баручы белгече Рәис Идрисов, шулай ук район авыл хуҗалыгы һәм азык-төлек идарәсе җитәкчесе Тәлгать Халитов һәм белгечләр, "Гостехнадзор«ның баш дәүләт инспекторы Илдар Шәйхаттаров һәм башкалар кергән иде.

Комиссия үз эшен «Агро-Вест» җәмгыятендә башлады. Аннары алар «Цильна», «Чүпрәле Рассвет Агро» һәм «АгроТрансПорт» җәмгыятьләрендәге машина-трактор паркларында булдылар.

Кыр эшләре тәмамланганнан соң механизаторларның төп бурычы -техниканы кышкы саклауга кую.

Районның авыл хуҗалыгы предприятиеләрендә техниканы пычрактан һәм үсемлек калдыкларыннан чистарту, пневматик шиналарны кояш нурларыннан һәм атмосфера явым-төшемнәреннән саклау өчен зур эш башкарылган. Комиссия әгъзалары техниканы саклауга кую эшләренең барышын, машина-трактор паркларындагы тәртипне һәм авыл хуҗалыгы предприятиеләренең авыл хуҗалыгы машиналарын көзге -кышкы ремонтлауга әзерлеген тикшерделәр һәм бәяләделәр.

Комиссия эшенең нәтиҗәләре буенча, район хуҗалыкларының күбесендә техниканы язгы кыр эшләренә планлы әзерләү традицион рәвештә урып-җыю тәмамланганнан соң ук башланган. Район хуҗалыкларында техниканы язгы чорга әзерләү программалары эшләнгән, ремонт буенча бригадалар төзелгән.

Комиссия машина-трактор паркы территориясен төзекләндерүне, ремонт-хезмәт күрсәтү базасының кышкы эшләргә әзерлеген дә бәяләде. Комиссия, көн дәвамында барлык хуҗалыкларда район авыл хуҗалыгы идарәсе белгечләре белән бергә булып, әзерлеккә уңай бәя бирде.