Чүпрәле укучылары шахмат буенча ярышты

Турнирда мәктәп түгәрәкләрендә шөгыльләнүче 20 мәктәпнең иң көчле яшь шахматчылары командалары, шулай ук, 1 санлы Иске Чүпрәле урта мәктәбенең "Талантлар планетасы" балалар иҗат йорты базасындагы "Шахмат" түгәрәгендә шөгыльләнүчеләрнең тагын бер командасы катнашты. 

Район башлыгы урынбасары Алексей Ярухин яшь шахматчыларны сәламләп:

- Шахмат уйнау акылны, фикерләүне үстерә. Безнең районда шахмат яратучы балалар күп, аларны табарга һәм аларның талантларын үстерергә  кирәк. Һәр мәктәптә шахмат түгәрәкләре эшләсен иде. Ә сезгә җиңүләр, уңышлар телим, - диде.

Һәр командада өчәр уенчы: ике малай һәм бер кыз бар иде. Барлык командалар 4 төркемгә бүленде. Уеннар олимпия системасы буенча уздырылды. Финалда исә 3, 2, 1 урыннар өчен көч сынаштылар.

Ярышның хөкемдары Ханбик Камалов булды.

Гомуми исәп нәтиҗәләре буенча Иске Шәйморза урта мәктәбе командасы - 1нче урынны, Уби урта мәктәбе – 2нче, 1 санлы Иске Чүпрәле урта мәктәбе командасы 3нче урынны яулады.

Аларга шахмат буенча район Федерациясенең Грамоталары, 1, 2, 3 дәрәҗә кубоклары, медальләре һәм истәлекле бүләкләре тапшырылды.

Шахмат буенча район ярышларының иганәчесе - шахмат буенча федерациянең район филиалы җитәкчесе Алексей Ярухин.