Ҫӗтнӗ чун

Кун иртрӗ. Хӗвел те анчӗ.
Каҫ сӗмӗ хуплать ҫӗре.
Уйӑх та таҫта ҫухалчӗ,
Кассӑн-кассӑн ҫил вӗрет.

Урамра сулхӑн та нӳрлӗ –
Юр пӗтмен-ха ирӗлсе.
Ыйха путнӑ ялӑм мирлӗ 
Ҫывӑрать ҫӗн кун кӗтсе.

Шӑплӑхра тӑма асамлӑ,
Чӑрмав ҫук шухашлама.
Иртсе кайрӗ ман ачалӑх,
Шуратать ҫӳҫ пуҫӑма.

Тем самант – хам та сисмерӗм,
Ҫитсе лартӑм ҫак куна.
Телейне мӗнне пӗлмерӗм,
Йӑшкаттарать вут чуна.

Кӑлӑхах, тен, хурланатӑп?
Ырӑ-сывӑ-ҫке, чӗрех.
Ҫук! Тӗллевсӗр пурӑнатӑп.
Сая ярса ӗмӗре.

Кам калать, телей мӗнре-ши?
Ырлӑха мӗнле тупас?
Пурнӑҫ тӗлӗшне пӗлсессӗн
Мӗн виличчен савӑнас.

                       Николай Андреев, 
                         Ҫӗнӗ Йӗлмел ялӗ.