Хусанта Ҫӗпрел районӗн культура кунӗ иртрӗ

Мероприяти Хусанăн"Московский" культура центрӗнче иртрӗ. 
Мероприятие килекен хӑнасене Çӗпрел ҫыннисем наци тумӗсемпе, ҫӑкӑр-тӑварпа, тутар, чӑваш, вырӑс апачӗпе, фольклор коллективӗсемпе кӗтсе илчӗç. «Хӗлхем», «Калинушка», «Сюмбела», «Çӗпрел», «Яшьлек», «Мишари», «Тан», «Умырзая», «Яз нуры» творчество коллективӗсем хутшăннипе «Ҫӗпрел пулса кайни» тесе ят панă театрализациленӗ представлени, «Туслăх уявӗ», «Хӗр вӑрлани» йăлине сӗнчӗç. 
Центр умӗнчи лаптăкра тулли куравпа интерактивлӑ программа ӗҫлерӗ. Кунта «Тăваньел пахчисем», «Исток», «АгроТрансПорт», «Çăкăр завочӗ» тата ытти обществӑсем хӑйсем туса илнӗ продукцисемпе уява килекенсене илӗртсе тăчӗç.

Куравсемпе мастер-классенче платникӑн «Пплатник ҫурчӗ», ялти ăстаҫӑ Анатолий Ивановӑн «Карҫинкка явасси», Наталья Куракинан «Ткачество», Галина Кудряшова «Шӑрҫасенчен тухья тăвасси», Таслима Замалтдинован «Çӑм арласси», Галина Захарован «Керамикӑна илемлетесси» мастерскойӗсем ӗҫлерӗç.

Библиотека, ачасен искусство шкулӗн, музей ӗҫченӗсем те, çавӑн пекех, район энциклопедийӗн, районти ялсен историне, ентешсен, таврапӗлӳҫӗсен кӗнекисене, эмел курăкӗсен кӗтесне, вӗренекенсен пултарулӑхне куравра тӑратнӑччӗ. Пӗтӗмӗшпе илсен, ҫав кун Çӗпрел ҫыннисен культурӑпа искусство енӗпе тунӑ пысӑк ҫитӗнӗвӗсене курма пулчӗ.

Паллах, наци апачӗсем уйрӑмах илӗртсе тăчӗç. Апат-ҫимӗҫе хăнасене «Имянаречие» тесе ят панă чӑваш халӑх йӑлине тата пенсионерсен союзӗн ертӳҫи Дилюза Азизова тӑрӑшнипе хӑнасене сӗнчӗç.
Ҫӗпрел ҫыннисем курав валли 45 тӗрлӗ сӑмавар пухса хатӗрленӗ. Ҫак коллекцие тӑвакансем — Кивӗ Чукал ялӗнче пурӑнакансем тата уйрӑм коллекционер Рустам Фаткуллин. Коллекцире 1900 ҫулпа çыхăннă сӑмавар экспоначӗсем те пурччӗ.

Мероприятире ҫулталӑк хушшинче тӗрленӗ татӑксенчен пуҫтарнӑ Ҫӗпрел районӗн карттине те кăтартрӗç. Картта хӑйне евӗрлӗ культурипе тулли пулнă 19 ял тӑрӑхне пӗрлештерет. 

Уявӑн кульминаци пайӗ Культура центрӗн сцени ҫинче иртрӗ. Мероприятие килнисене район пуҫлӑхӗ Марат Гафаров, Тутарстанри Культура министрӗн ҫумӗ Ленар Хакимзянов саламларӗҫ. 

Районти пултарулӑх артисчӗсен юррисемпе ташшисем хӑнасен чун-чӗрисенче ҫутӑ йӗр хӑварчӗ. Пирӗн ентеш Эльмир Низамов хӑйӗн пултарулӑхӗпе концерта уйрӑмах илем кӳчӗ. Мероприятире Раҫҫей Геройӗ, пирӗн ентеш Газинур Хайруллин та хутшӑннине палăртса иртес килет. 

Хусанти Ҫӗпрелӗн культура кунне хисеплӗ жюри 47 позиципе лайăх енчен хак пачӗ. Пӗтӗмлетӗве кӗтмелли ҫеҫ юлчӗ. Конкурс условийӗпе килӗшӳллӗн ҫӗнтерӳҫӗ район 3 миллион тенкӗ виҫепе укҫа илӗ.