Ҫурхи призыв ыйтӑвӗсем енӗпе канашлу

Канашлӑва Пӑвапа Ҫӗпрел районӗсен ҫар комиссарӗ Радик Тухфатуллин, Ҫӗпрел районӗн прокурорӗ Олег Гайнутдинов, ял тӑрӑхӗсен пуҫлӑхӗсем, ҫавӑн пекех, право хуралӗн структурин представителӗсем хутшӑнчӗç.

Пӑвапа Ҫӗпрел районӗсен ҫар комиссарӗ Радик Тухфатуллин палăртса иртнӗ тăрăх, 2023 ҫулхи апрелӗн 1-мӗшӗнчен пуҫласа Раҫҫей Федерацийӗн оборона Министерстви ҫурхи призыва пуҫлама планлать. Ҫурхи призыв июлӗн 15-мӗшӗччен тӑсӑлӗ.

– Раҫҫей историйӗнче РФ Хӗҫ-пӑшаллӑ Вӑйсен ретне призыв вăхăтне пӗр хут кăна, иртнӗ çулхи кӗрхи кампанире РФ Президенчӗ йышăннă уйрӑм мобилизацие пула кӑна куҫарнӑччӗ. Кӑҫал призыв апрелӗн 1-мӗшӗнчен пуçланать. Март уйăхӗ вӗҫлениччен кун пирки РФ Президенчӗн Указӗ тухӗ. Апрелӗн 1-мӗшӗнчен пуҫласа ҫар комиссариачӗсем пурте РФ Хӗҫ-пӑшаллӑ Вӑйӗсен ретне призывниксене йышӑнма пуҫлаҫҫӗ. Ҫӗпрел районӗнче призыв комиссийӗн ӗҫӗ апрелӗн 10-мӗшӗнчен пуҫланать, темиҫе куна тӑсӑлать. Салтаксен малтанхи партине кӑҫалхи апрель уйăхӗн варринче çар служине яма палӑртаççӗ, – терӗ Радик Тухфатуллин.

Çар комиссарӗ призывниксене вӗри точкăсене ямассине пӗлтерчӗ. Призывниксем пурте пирӗн ҫӗршыв территорийӗнче ҫар чаҫӗсенче службӑра пулӗҫ.

– Тутарстан Республикинчи Пӑва тата Ҫӗпрел районӗсен ҫар комиссариачӗ 60 ҫула ҫитичченхи арçынсене ҫар службине контрактпа кайма чӗнсе калать. Контракт тăвакансене пӗр хут тӳлев 195 пин тенкӗ шутланать.  Уйӑхсерен укҫа-тенкӗпе тивӗçтересси 150 пин ытла тенкӗпе танлашать. Унсӑр пуҫне премисем, тӳлевсем палӑртаҫҫӗ, уйрӑм ҫӑмӑллӑхсем пур. Контракта 11 уйӑхлӑха тăваççӗ, – тесе сăмахне малалла тăсрӗ ҫар комиссарӗ. – Пур ыйтупа та Пӑвапа Ҫӗпрел районӗсен ҫар комиссариатне 8 (84374) 3-19-80 тата Ҫӗпрел районӗнчи ҫар комиссариачӗн представительне 8 (84375) 2-23-09 (Нуршат Салихова) телефонпа шăнкăравламалла, – терӗ вӑл.

Канашлура ял тăрăхӗсен пуҫлӑхӗсене ҫамрӑксемпе тата вӗсен ҫемйисен членӗсемпе хастар ӗҫлеме сӗнчӗҫ.