Тутар Саплăк ялӗнчи Культура объектӗнче юсав ӗçӗсем пыраççӗ

Строительствӑна пур нормӑсемпе требованисене, ҫав шутра пушар хӑрушсӑрлӑхне те, шута илсе тӑваҫҫӗ.

«Вега-строй» организаци пирӗн районта «Солнышко» ача садӗнче, «Çӗпрел отрасль технологийӗсен техникумӗнче» юсав ӗçӗсем илсе пынăччӗ. Çак объекта та вӗсене шанса панă. Апрель уйӑхӗнче пуҫланнӑ ӗҫсем вӗҫленсе пыраççӗ.

Хальхи вӑхӑтра строительсем ҫурт ӑшӗнчи пӳлӗмсене юсаҫҫӗ: алӑксен, чӳречесен хӗррисене, маччине тӑваҫҫӗ. Строительство материалӗсене те турттарсах тăраççӗ. 

Маччине тăваççӗ тени те, ахаль кăна сăрласа тухни ҫеҫ мар, зданийӗн ҫутӑ тытӑмне ҫӗнетни те. Ӗçлекенсем зданийӗн тулашри фасадне илемлетес тата ӑшӑтас енӗпе ӗҫсене те пурнăçлаççӗ. Организацийӗн ӗçченӗсем Иван Ерусланов, Владимир Хлынов, Руслан Шайдуллин тата Евгений Пахомов зданийӗн тулаш ен фасадне ӑшӑтас ӗçсемпе тӑрӑшаҫҫӗ.

— Кунта пӗтӗм ӗҫе проектпа килӗшӳллӗн туса пыраҫҫӗ. Стройматериалсем енӗпе нимӗнле чӑрмав та ҫук, вӑхӑтра кӳрсе тăраççӗ. Кӗркунне тӗлне пӗтӗм ӗҫе вӗҫлесе, объекта усă курма пама планлатпăр, — теҫҫӗ строительсем.

— Юлашки ҫулсенче ялти Культура çуртӗнче хальхилле тӗп юсав ӗçӗсем иртмен. Пӗчӗкрех юсав ӗçӗсем илсе пынă ӗнтӗ. Кӑҫал вара пирӗн Культура ҫуртне хальхи стильпе юсаса ҫӗнетеҫҫӗ, хӑтлӑ условисем туса параççӗ. Эпир, ял ветеранӗсем, питӗ савӑнтӑмӑр ӗнтӗ, мӗншӗн тесен мероприятисенчен нумайăшне кунта ирттерме тӑрӑшатпӑр-çке, — тет ялти ветерансен совечӗн ертӳҫи Валерий Марков.

Справка

Тутар Саплăк ялӗнчи Культура ҫурчӗ икӗ ялта пурӑнакансене: Алешкин-Саплăк тата Тутар Саплăк ялӗсене ӗçлӗ пулăшу кăтартать.
Культура ҫуртне никӗс хывни 1974-77-мӗш ҫулсене тӳрӗ килет. Объекта вара 1977 ҫулта купаласа лартса, усă курма панă. 80-мӗш ҫулсен варринче кăштах юсав ӗçӗсем ирттернӗ. 1995 ҫулта куракансем валли ҫӗнӗ кресло-ларкăчсем вырнаçтарнă. 2000 ҫулта ялти Культура çуртне кӑмрӑкпа хутса ăшăтассинчен газ çине куçарнă.