Сабантуй–Акатуй уявӗ умӗн акнă анасене йышăнаççӗ

Ака вӗçленчӗ. Çурхи акара кам мӗнле ӗçленине палăртмалли вăхăт çитрӗ.

Çак ятпа районти ял хуçалăхӗпе апат-çимӗç управленийӗ çумӗнче йӗркеленӗ комисси, управлени начальникӗ Талгат Халитов ертсе пынипе, уй-хирсене çул тытрӗ.

Çӗпрелӗн çӗр ӗçченӗсен пысăк шайри уй-хир отраслӗн культури пур. Çакна республика шайӗнче ял хуçалăхне пăхăнса тăракан министерствăн, ытти обществăсен ертӳçисем те пӗлеççӗ. Тата пирӗн енсене килнӗ çынсем те хирсен, çутçанталăкăн илемлӗхне курса тӗлӗнеççӗ. Хальхи вăхăтра ку питех те уççăн палăрать – кӗрхи тырă анисем сип-симӗс тӗсе çаврăнчӗç.

Комисси вара акнă анасене тӗплӗн тишкерчӗ. 1 тăваткал метр çӗр çине миçе калча тӳрӗ килнӗ, хир хӗррисенчи пăрăнăç полосисене ӗçе кӗртнӗ-и, вăрлăх ӳкмесӗр, пушă юлнă участоксем çук-и – çаксенчен кашнинех уйрăм тимлӗх парăнчӗ. Паллă, хирсем пушă юлни, тырă ӳсес вырăнне çумкурăк ӳссе ларнине никам та кăмăлламасть. Апла пулсан та, çын факторӗ тени те пур вӗт-ха. Ӗç кăтартăвне йӗркеленӗ, çӗр ӗçченӗ-механизатора хавхалантаракан мероприятисем ӗçленнӗ, агрономсем «çывăрса» çӳремен обществăсемпе    предприятисенче  çитменлӗхсем пулмаççӗ, паллах. Пирте çавăн пек предприяти вăл – «Цильна». Çак хуçалăхăн уй-хирӗсем культурăлăх енчен кăçал та чи лайăххисем пулса палăрчӗç. Хресчен-фермер хуçалăхӗсенчен чи лайăххи – «Бикчуров Р.А.» хуçалăхне те палăртрӗç.

Комисси «Эталон-Агро», «Дементьев ячӗллӗ агрофирма», хресчен-фермер хуçалăхӗсен акăннă лаптăкӗсене те пăхрӗ. Лаптăксем алă тупанӗнчи пек – çӗре улталама пулмасть. Вăл кам мӗнле ӗçленине уççăн кăтартать. Хакӗ вара, каланă пек, Акатуйра палăрать.  паттăрсене чыслӗç.

Сабантуй–Акатуй

Программăра:

10.00 – Уява торжествăлла майпа уçасси. Паттăрсене чысласси. Театрализациленӗ представлени.

11.00 – Кӗрешӳ. Спорт тата халăх вăййисем.

Тӗрлӗ лаптăксенче концерт программисем. Аттракционсем. Суту-илӳ ярмăрккисем тата ыттисем.

12.00 Ипподромра лашасен чупăвӗ.