Район пуçлăхӗ хӗрарӑмсене йышăнчӗ

– Сирӗн ӗҫченлӗхӗре, энергийӗре, кӑткӑс та яваплӑ ӗҫе пурнăçлама, ҫав вӑхӑтрах илӗртӳллӗ те уҫӑ, ырă кăмăллă пулса юлма пултарайнине ăмсанатпăр. Эпир сирӗнпе мăнаçланатпӑр. Сирӗн сăн-питӗр çинчен йăл кулӑ ан ҫухалтӑр, эсир яланах ҫавăн пек илемлӗ, илӗртӳллӗ, çепӗç пулса юлăр, – терӗ район пуçлăхӗ Марат Гафаров, залра ларакан этемлӗхӗн черчен пайне – хӗрарăмсене чысласа.

Хисеплӗ хӗрарӑмсене «Цильна» обществӑн директорӗ Барис Гафуров та саламларӗ. Барис Аппаувич «Цилна» хуҫалӑхра паян 80-а яхӑн хӗрарӑм ӗҫленине палӑртса иртрӗ. Вӗсенчен 60-шӗ выльӑх-чӗрлӗх отраслӗнче ӗҫлеҫҫӗ. Барис Гафуров общественность ялта ӗçлесе пурăнакан хӗрарăмсен умӗнче парăмлă пулнине аса илтерчӗ.

– Ялта пурăнакан хӗрарӑм пурнӑҫӗ ҫӑмӑл тесе каламӑттӑм эпӗ. Мӗн иртенпех ура ҫинче вӑл: ӗне сăвать, выльӑх-чӗрлӗхне шăварать, çитерет, унтан мăшăрне, ачисене пăхса, ӗҫе, шкула ӑсатать. Унтан хӑй ӗҫе кайма хатӗрленет. Фермӑра, хуҫалӑхра ӗҫлекен хӗрарӑм вара ӗçне ирхинехи 4 сехетре ӗҫе пуçăнать. Ҫаксене пурне те ял хӗрарӑмӗ, ялан тенӗ пекех, мӗнле те пулин парнене кӗтмесӗр, чыс-хисеп ӗмӗтленмесӗр туса пырать. Ҫавӑнпа та эпӗ ялта пурӑнма юлнă хӗрарӑмсем умӗнче пуҫ тайса, вӗсене хӗрарӑм телейне туйса пурăнма сунатăп. Çавăн пекех, кашни хӗрарăма анне пулнă май ачисене, асламӑшӗ-кукамăшӗ пулнă май – мӑнукӗсене юратма телей пӳртӗрччӗ, – терӗ Барис Гафуров.

Ачасен творчество çурчӗн çамрăк директорӗ Олег Кузнецов та уяв ячӗпе саламласа, хӗрарӑмсен хӑюлӑхне, тавçăрулăхне палăртса,  вӑл пӗр ӑсчахăн: «Хӗрарӑм арҫынна райран илсе тухнă, хӗрарӑм ӑна рая каялла тавӑрма та пултарать», текен сăмахӗсене аса илтерчӗ.

Савӑнӑҫлӑ лару-тӑрура район пуҫлӑхӗ Марат Гафаров хӗрарӑмсене патшалăх парнисене пачӗ.

Мероприяти уяв концерчӗпе çыхăнса пычӗ.

– Эпӗ питӗ хумхантăм, чысларӗç, парнесем пачӗҫ. Уява питӗ лайăх хатӗрленнӗ, тавтапуҫ йӗркелӳҫӗсене, – тесе хăйӗн савăнăçне пӗлтерчӗ мероприяти вӗçленес умӗн, нумай çул Марс вӑтам шкулӗнче вырӑс чӗлхипе литературине вӗрентнӗ ветеран-педагог Гульсина Камалтдинова.