Район, Республика кунӗнче

Августӑн 30-мӗшӗнче хӑнасем пӗр харӑсах икӗ уяв — район кунне тата Тутарстан Республикин кунне — палăртса ирттерчӗç.

Район центрӗнче ирех «Пыл ярмăркки» пуҫланса кайрӗ. Кӳршӗ районсенчен, Чӑваш Республикинчен, Ульяновск облаҫӗнчен, Мӑкшӑ Республикинчен тата ытти регионсенчен килнӗ, вырӑнти хурт-хăмăр ӗрчетекен ăстасем Çӗпрел çыннисене, хӑнасене хӑйсен пыл продукцийӗсене сӗнчӗç.

Уяв ячӗпе, çаплах, пултарулӑх артисчӗсен, фольклор коллективӗсен концерт программине те хатӗрленӗччӗ. «Чүпрәле» паркӗнче çар юхăмӗн ветеранӗсен совечӗн ертӳçи Виктор Петухов йӗркеленӗ куравпа та паллашма пулчӗ.

Уявӑн официаллӑ пайӗ район пуҫлӑхӗ Марат Гафаров, ТР Патшалӑх Совечӗн депутачӗсем Шакир Ягудин, Ринат Гайзатуллин саламланинчен пуҫланчӗ. Сцена ҫине ашшӗ-амӑшӗсемпе ҫар служащийӗсене, кӗске вӑхӑтлӑха отпуска таврăннă ятарлӑ ҫар операцине хутшӑнакасене, вӗсен ашшӗ-амăшӗсене чӗнсе кăларчӗç. Вӗсене парнесем пачӗç. Тырпул пухса кӗртнӗ хресчен-фермер хуҫалӑхӗсен тата обществăсен ертӳҫисене те чысларӗҫ. Район пуҫлӑхӗн Тав ҫырӑвӗсене «Цильна» обществӑн директорӗ Барис Гафуров, «Çӗпрел Рассвет Агро» обществӑн ӗҫ тӑвакан директорӗ Алексей Копанев, «Низамов А. А.» хресчен-фермер хуçалăхӗн пуҫлӑхӗ Альберт Низамов, «Бикчуров Р. А.» хресчен-фермер хуçалăхӗн пуҫлӑхӗ Равиль Бикчуров, «Махмутов И. Ф.» хресчен-фермер хуçалăхӗн пуҫлӑхӗ Ильмир Махмутов тивӗҫлӗ пулчӗç.
Уявра ял хуҫалӑхне, агропромышленность комплексне аталантарас ӗҫе пысӑк пай кӗртнӗ, культура, социаллӑ пурнӑҫпа экономика сферинче тӳрӗ кӑмӑлпа ӗҫленӗ тата ҫитӗнӳсем тунă Çӗпрелӗн çыннисене те чысларӗç. Вӗсене «Ҫӗпрел районне йӗркеленнӗренпе — 90 ҫул» юбилей медалӗсене пачӗç.

Района аталантарас енӗпе нумай çул пӗр коллективра ӗçленӗ мăшăрсене, Татар Паснапуç ялӗнче 40 çул пӗрле пурăнса, рубин туйне палăртса ирттерекен Асхатьпа Рамзия Шараповсем те парнесемсӗр юлмарӗҫ.
Мероприятире конкурссем ирттерчӗҫ. Ҫак конкурссене пӗтӗмлетсе, ҫӗнтерӳҫӗсене район пуҫлӑхӗн Дипломӗсене пачӗç.

Район тата Республика кунӗсене уявланӑ май, районăн 14 ҫамрӑк гражданӗ паспортлă пулчӗҫ. 
Уяв вӑхӑтӗнче инновацисене ӗҫе кӗртес тата культура йӑли-йӗркисене упраса хӑварас енӗпе резус центрӗн Хисеп грамотисене, районти Ӗҫ тӑвакан комитетăн ертӳҫин Тав ҫырӑвӗсене, ятарлӑ ҫар операцине хутшӑнакансене пулӑшнӑшӑн медальсем, парнесем пачӗç.

Саламланисем, парнесем парасси культура ӗҫченӗсем хатӗрленӗ концерт номерӗсемпе çыхăнса пычӗç.
Уяв каҫхине те малалла пычӗ. Ҫӗпрел ҫыннисемпе хăнасем валли «Чүпрәле» паркӗнче тутар тата чӑваш эстрадин ҫӑлтӑрӗсем хутшӑннипе концерт программине йӗркеленӗччӗ.