Пурнăçăн аслă çулӗ кӗтет

Районти пур                       шкулсенче те юлашки шӑнкӑрав янăрарӗ.                 Пӗр енчен, тинех, вӗренӳ ҫулӗ хыҫа юлнӑ пек туйӑнать. Анчах ҫуллахи каникул ҫинчен шухӑшлама иртерех-ха – вӗренсе тухакансемшӗн чи кирлӗ тапхӑр пуҫланать кӑна.  Умра – Пӗрлехи патшалӑх экзаменӗсем...   11 ҫул тăршшӗ пынă шкулти яланхи пурнӑҫ вара, вунпӗрмӗш класра вӗренекенсемшӗн шӑпах ҫак «Юлашки шӑнкӑравпа» вӗҫленет.

Кун ҫинчен 1 номерлӗ Кивӗ Çӗпрел вӑтам шкулӗнче тата Çӗпрелӗнчи нумай профильлӗ лицейре иртнӗ мероприятисенче хутшӑннӑ район пуҫлӑхӗ Марат Гафаров палăртса иртрӗ.

– Паянхи уяв савăнăçлă та, хумхануллă та. Савӑнăçлă – эпир куç умӗнче ӳссе ҫитӗннӗ вӗренекенсене пурнăçăн аслă çулӗ çине ӑсататпӑр, вӗсенчен уйрӑласси вара, питӗ хумхануллă. Вӗренсе тухакансене Пӗрлехи патшалӑх экзаменне ӑнӑҫлӑ пама сунатӑп. Хăвăр кăмăлланă вӗренӳ заведенийӗсене кӗрсе, эсир юратнӑ профессие суйласса, мӗнпур йывӑрлӑхсене те ҫӗнтерессе шанатӑп. Паян майсем пысӑк, сирӗншӗн пур вӗренӳ заведенийӗсен алӑкӗсем те уҫӑ, – терӗ вӑл.

Пӗлӳ паракан учрежденисен директорӗсем Лилия Насибуллинапа Наталия Маркова та пуҫламӑш классен учителӗсене, класс ертӳçисене, ашшӗ-амӑшӗсене ырӑ сунăмсем сунчӗç.

Пуҫламӑш классенче вӗренекенсем вара шкул пӗтерекенсене сӑвӑ йӗркисем урлă саламларӗç. Шкултан аслă пурнăç анлăшне вӗçекенсем хӑйсем те малашнехи пурнăçра ашшӗ-амӑшӗсемпе вӗрентекенсен шанăçне тӳрре кӑларма сӑмах пачӗҫ. Вӗсем юлашки шкул вальсне ташларӗç, юрӑсем юрларӗç, шкул пурнӑҫӗпе сывпуллашнă май, тӳпене шарсем вӗçтерчӗç. Чи салхуллă самант, паллах, юлашки шӑнкӑрав пулчӗ.

Кивӗ Çӗпрелӗнчи нумай профильлӗ лицейрен вӗренсе тухакан Ильян амӑшӗ тата вӗрентекенӗ  Ирина Ильина:

– Паян питӗ хумхануллă кун. Куҫсем шывланаççӗ. Ачасем ачалӑхпа сывпуллашни çакă ӗнтӗ, умра пурнӑҫăн  аслă çулӗ кӗтет. Çак малашнехи пурнăç  çулӗ çинче шкул пӗтерекенсене пурне те ăнăçусем сунатӑп, телейлӗ пулччӑр!

1 номерлӗ вăтам шкултан вӗренсе тухакан Камилян  амăшӗ Альбина Шарафутдинова:

– Пирӗн ачасен малашлӑхӗ лайӑх пултӑрччӗ. Эпир вӗсен ăнăçăвӗсемпе, савăнăçӗсемпе хӗпӗртесе, мăнаçланса пурăнăпăр. Майӑн 26-мӗшӗ –  Пӗрлехи патшалӑх экзаменӗн пӗрремӗш кунӗ. Умри пӗлӳ сăнавӗсене иртме ăнăçу сунатпăр!