Ҫӗпрел районӗ «Тутарстан — ҫитӗнӳсен Республики» автобус марафонӗ килчӗ

Районти Культура çуртӗнче РФ Патшалӑх Думин депутачӗпе Айрат Фарраховпа, Тутарстанпа Ульяновск облаҫӗнчи патшалӑх пурлӑхне тытса пырас енӗпе Федераци агенствин регионсен хушшинчи территорири управленийӗн ертӳҫипе Альберт Хайрутдиновпа тата Ҫӗпрел муниципаллă районӗн пуҫлӑхӗпе Марат Гафаровпа тӗлпулу пулса иртрӗ.

Мероприятире район активӗ, предприятисемпе организацисен ертӳҫисем, предпринимательсем, вырӑнти депутатсем, ял тăрăхӗсен пуҫлӑхӗсем хутшӑнчӗҫ.

Тӗлпулу пуҫланиччен Айрат Фаррахов 1 номерлӗ Кивӗ Çӗпрел вӑтам шкулне ҫитсе курнӑ, кӑҫал шкул пӗтерекен вӗренекенсемпе тӗл пулчӗ, вӗренӳ процесне йӗркелес ӗçпе паллашрӗ.
Малалла депутат граждансене йышӑнчӗ. Йышӑну вӑхӑтӗнче ҫул-йӗр строительствин, социаллӑ пӗлтерӗшлӗ объектсене тӗпрен юсамалли ыйтусене хускатрӗç. Пур ыйтусене те парламентари хӑйӗн контрольне илчӗ.

Ҫӗпрел ҫыннисемпе тӗл пулнӑ чухне РФ Президенчӗ Владимир Путин ертсе пынипе пурнӑҫланакан наци проекчӗсем ҫинчен, Тутарстан Республикин, ҫав шутра Ҫӗпрел районӗн, ҫитӗнӗвӗсем ҫинчен калаçрӗç.
Район пуҫлӑхӗ Марат Гафаров наци проекчӗсене вăя кӗртес енӗпе нумай ӗç пурнӑҫланнине палӑртрӗ.

— Районта тата малалла та пур программӑсем те пурнӑҫланса пырӗç. Эпир республикӑн «хӗвеланӑҫ хапхи» пулса тӑратпӑр. Хӑтлӑ ҫуртсем, общество анлăшӗсем пулсан ял ҫыннисен пурнӑҫӗ те лайӑхланӗ. Пур ыйтусене те пӗрле татса парӑпӑр, — терӗ вӑл.

Айрат Фаррахов наци проекчӗсен масштабӗсем питӗ анлӑ пулнине палӑртрӗ. Кашни районшăн хăйне евӗрлӗ. 

— Ҫӗпрел районӗшӗн ҫул тӑвасси, ӗҫмелли шывпа тивӗҫтересси пӗлтерӗшлӗ пулса юлать. Малалла та ҫӗнӗ проектсем пулӗҫ, Президент Владимир Владимирович Путин тата темиҫе наци проекчӗ сӗнӗ. Пурӗ те пӗр шухӑшлă пулни кăна кирлӗ, — терӗ Айрат Фаррахов.

Альберт Хайрутдинов наци проекчӗсем Тутарстанăн пурнӑҫне мӗнле витӗм кӳни ҫинчен калаçрӗ. 

— Наци проекчӗсем — пире пурӑнма тата аталанма май паракан стимул, — терӗ вӑл.
Тӗлпулу Тутарстан Республикин Патшалӑх юрӑпа ташӑ ансамблӗ тата Тутарстанăн халӑх артисчӗ Резеда Шарафиева хутшӑннипе концерт программипе вӗҫленчӗ.

Справка
Тутарстанра автобус марафонӗ мартăн 1-мӗшӗччен тӑсӑлать. 
Марафон 29 район урлă иртет.