«Помощь рядом! Пулăшу юнашар!» ыркăмăллăх юхăмӗ

Çак проект Тутарстан Президенчӗ  Рустам Минниханов инициативипе пурнӑҫланать. Проект çӗршывра коронавирус инфекцийӗ сарăлнине пула  пурнӑҫри йывӑр лару-тӑрура юлнисене пулӑшу кăтартассине шута илнӗ тата ăна республикăра пурăнакан 55 пинрен ытла çынна пама палӑртнӑ. Проект «Ак Барс банк»  финанс пулӑшăвӗпе иртет.

Пулӑшу илекенсен чи пысӑк ушкӑнӗ – çын пуçне вăтам тупăшӗ пурăнмалли минимумран (8938 тенкӗ)  сахалрах пулнă ҫемьесенчен 8 ҫултан аслӑрах ачасем. Апат-ҫимӗҫ пуххине ҫавӑн пекех  тупăшӗ 7311 тенкӗрен сахал пулнă 16 пинрен ытла 65 ҫултан аслăрах пӗччен пенсионер  тата 9 пин  çул çитмен ача илӗ, вӗсен ашшӗ-амăшӗ уйрăм предприниматель е харпăр хăйне ӗçпе тивӗçтерекен пулнă май пандемирен уйрăмах сиен курнă тытăмсенче регистрациленнисем. Апат-ҫимӗҫ пуххисене икӗ уйӑх хушшинче (май, июнь) тӑватӑ хутчен парӗҫ.

Майӑн 3-мӗшӗнче «Помощь рядом! Пулӑшу юнашар!» логотипне вырнаçтарнă пӗрремӗш çăк машини Çӗпрел районне те апат-ҫимӗҫ пуххисем илсе килчӗ. Çав кунах  апат пуххисене пушатнă çӗрте тата килӗсене валеçнӗ çӗрте 50 яхӑн волонтер, ял тăрăхӗсен пуҫлӑхӗсем хутшӑнчӗҫ.

Апат-ҫимӗҫ пуххисене валеҫекен волонтерсем хушшинче район пуҫлӑхӗ Марат Гафаров та пурччӗ. Вӑл Кивӗ Ҫӗпрел ялӗнче пурăнакан ултă ача амăшӗн Гульфинур Валиуллинан ҫемйинче пулчӗ тата вӗсене икӗ апат-ҫимӗҫ пуххине пачӗ.

– Ҫак йывӑр вӑхӑтра пире пулӑшакансене тав тăватпăр. Пурнӑҫ лăпкă, тӗнче тăнăç тăтăр, ертӳçӗмӗрсене Турӑ сывлӑх патӑр, – терӗ Гульфинур Валиуллина.

Ҫавӑн пекех апат-ҫимӗҫ пуххине Марат Гафаров Кивӗ Ҫӗпрел ялӗнче пурăнакан Фиркать Айнуллова та  кӳрсе пачӗ.

– Çакăн пек пулӑшу маншӑн пысӑк парне. Пенсийӗм пӗчӗккӗ – 5 000 тенкӗрен кăшт кăна пысăк. Электричествăпа газшăн тӳлетӗп те пӗтсе те каять, апат-ҫимӗҫ туянма укҫа юлмасть та темелӗх. Ҫак ырӑ ӗҫе вăя кӗртнисене, ӑна пурнăçлакансене, пире аса илсе, тимлӗх кăтартакансене пысӑк тав тӑватӑп, – терӗ пенсионер.

Район пуҫлӑхӗ Марат Гафаров пандемине хирӗç кӗрешнӗ вӑхӑтра пурнӑҫра йывӑр лару-тӑрура юлнă, паянхи кун уйрăмах пулăшу кирлӗ пулнă çӗпрел çыннисене пулӑшу кăтартасси малалла пырассине пӗлтерчӗ. Çак юхăмра хутшăннă предпринимательсене, волонтерсене, тав тунине каларӗ.