«Малтисен юхăмӗ» пӗтӗмлетӳ турӗ, малашлăха плансем палăртрӗ

«Малтисен юхăмӗ» ачасемпе ҫамрӑксен организацийӗ 2022 ҫулхи июль уйӑхӗнче йӗркеленнӗччӗ.
Районти Культура çуртӗнче ҫак организацийӗн конференцийӗ иртрӗ. Мероприятире районти юхӑмăн уйрӑмӗн ӗҫ-хӗлне анализ турӗç, малашлӑх плансене ҫирӗплетрӗç.

Ҫак юхӑм нумайӑшне пионера, комсомола аса илтерет. «Малтисен юхӑмне» хутшӑнакансем, ӗлӗкхи пионерсем, комсомолецсем пекех, обществӑна аталантарас ӗҫе хӑйсенчен пай кӗртеççӗ.

Район пуҫлӑхӗ Марат Гафаров хӑйӗн сӑмахӗнче «Малтисен юхăмӗ» ҫӗршыв шайӗнче пысӑк вырӑн йышӑнса тӑнине палӑртрӗ.

— Çӗршывăмăр малашне те аталантăр тесен пуҫаруллӑ, хастар ҫамрӑксем пулма тивӗçлӗ. «Малтисен юхӑмӗ» ҫавӑн пек ҫамрӑксене пӗрлештерет. Сире пур пуҫарусенче те ӑнӑҫу, пурӗ те малалла кăна ăнтăлма сунатăп, — терӗ вӑл.

Районти юхӑмăн уйрăм тӗп специалисчӗ Раниля Алиуллова иртнӗ тапхӑрта пурнăçланă ӗçсем çинчен тӗплӗ отчет туса пачӗ. Вăя кӗртнӗ проектсем, çӗнсе илнӗ ăнăçусем ҫинчен калаçрӗ. Малашлӑх планне сӗнчӗ. Тӗпрен илсен, планра юхăмăн географине анлӑлатма, район пурнăçӗнче «Малтисен юхăмӗ» хутшӑннипе нумай мероприяти ирттерме палӑртнӑ.

Мероприятире районти юхӑмăн ҫӗнӗ ертӳçине суйларӗç. Унăн ертӳçи пулма 1 номерлӗ Кивӗ Çӗпрел вӑтам шкулӗнче вӗренекен Диляра Шарапована çирӗплетрӗç. 
Конференцире районăн ҫамрӑк гражданӗсене паспорт та пачӗç. Юхӑм составне ҫӗнетрӗç. Парнесем, пултарулӑх номерӗсем те нумай пулчӗç.

Справка

«Малтисен юхăмӗ» организаци Раҫҫей Президенчӗ Владимир Путин пуҫарнипе 2022 ҫулхи июлӗн 14-мӗшӗнче йӗркеленнӗччӗ. 

Паянхи кун 4,7 миллион ытла хутшӑнакансене пӗрлештернӗ «Малтисен юхăмӗ» Раҫҫейре ачасемпе ҫамрӑксен чи анлӑ организацийӗ пулса шутланать. 

Ҫӗршывӑн 89 регионӗнче юхӑмӑн 40 пин ытла пуçламăш уйрăмӗ ӗҫлет. Движени ӗҫӗ-хӗлне 12 ҫул-йӗр кӗртнӗ. Вӗренӳпе наука, культура тата искусство, спорт, медиа тата коммуникаци, патриотизм, туризм тата ытти ҫул-йӗр кашнинех хӑйӗн вырӑнне тупма тата общество пурнӑҫне хастар хутшӑнма май парать.