Каччăсене ҫар службине ӑсатрăмăр

2023 ҫулхи ҫу уйӑхӗн 26-мӗшӗнче ирхине Петр Дементьев ячӗллӗ паркра призывниксене ӑсатмалли мероприяти иртрӗ. Унта призывник-каччăсем, районти ертӳҫӗсем, ял тăрăхӗсен пуҫлӑхӗсем, ашшӗ-амӑшӗсем, тӑванӗсем, тусӗсем пухӑннӑччӗ.

Çар службине каякан каччăсене районта уявлӑн ӑсатасси вунă ҫул каяллах пуçланнăччӗ. Çакă паян та малалла тӑсӑлать, Тӑван çӗршыва хӳтӗлекенсем тухса каяс умӗн ертӳçӗсем пулас салтаксене вӗрентсе калаҫҫӗ, ҫула тухас умӗн укҫа-тенкӗ параҫҫӗ.

Ку кӑҫалхи призыв кампанийӗн шайӗнче ирттерекен мероприятисенчен иккӗмӗшӗ. Мероприятире районти Ӗҫ тӑвакан комитетăн ертӳҫи Рустам Мухаметзянов хутшӑнчӗ, вӑл ачасем хӑйсен ҫар тивӗҫне чыслӑн пурнӑҫласса, Ҫӗпрел районӗн чысне хӳтӗлессе шаннине пӗлтерчӗ.

– Ҫарти служба мӗн ӗлӗкрен вăл яваплӑ тивӗҫ пулса пырать. Арҫын ҫемье, ҫӗршыв хуралӗнче тӑрать. Паянхи каччăсен те пурнăçӗнче ҫак задачӑна пурнӑҫламалли вăхăт. Ҫар службине тивӗҫлипе иртӗр, ырă-сывă таврăнмалла пултăр, – терӗ вӑл.

Ҫак самантран пуҫласа Ҫӗпрел ялӗнчен Максим Аръяхов, Ҫӗнӗ Ҫӗпрел ялӗнчен Руслан Бакиров, Кивӗ Ҫӗпрел ялӗнчен Ильшат Валеев, Ҫӗнӗ Йӗлмел ялӗнчен Алексей Еремеев тата Александр Николаев, Мучелей ялӗнчен Ильнур Идрисов, Чӑваш Ҫӗпрел ялӗнчен Никита Мадуров ҫар тумне тӑхӑнӗç. Калас пулать, ачасен пурин те служить тӑвасси килет. «Паян пирӗн ҫӗршывăн хуралӗнче, ятарлӑ ҫар операцийӗн зонинче тетесем, туссем, тӑвансем, пӗр ял ҫыннисем тăраççӗ.  Çӗршыв – пирӗн! Урӑхла йышăну тума пултараймастпăр», – теҫҫӗ вӗсем.

Мучелей ялӗнчен Илья Идрисовăн тетӗшӗ те ятарлӑ ҫар операцийӗн зонинче. «Хӑй ирӗкӗпе çар комиссариатне кайрӗ, повестка кӗтсе тăчӗ. Каятӑп, тесе кăна тăчӗ», – теҫҫӗ каччăн ашшӗпе амӑшӗ.

Пӗр çулталӑк – нумай мар, хӑйсен ҫывӑх ҫыннисене кӗтекенсемшӗн сахалах та мар. Чи пахи, ырă-сывă тӗл пулма пӳртӗрччӗ!