Ялта утă çулмалли вăхăт

«Цильна» обществӑра 3100 яхӑн мӑйракаллӑ шултра выльӑх пур, вӗсенчен 900-шӗ ӗнесем. Паллах ӗнтӗ, чи нумай выльăх апачӗ те çак хуçалăхра хатӗрленет.

Обществӑра выльӑх-чӗрлӗх валли утӑ хатӗрлес ӗç мӗнле пынипе интереслентӗмӗр. Уй-хирте Ринат Юсупов, Рамис Айнуллов, Фаргать Аббазов, Фарит Ахметзянов, Геннадий Щипков «МТЗ-82» тата «МТЗ-80» тракторсемпе косилкӑсем çаклатса, 140 гектар лаптӑкри костеркă уттине ҫулса пӗтернӗ. Обществӑри ӗҫсем пӗр-пӗринпе çыхăнса пыраҫҫӗ. Геннадий Щипковпа Искандер Хузиев, «МТЗ-80» тракторсенчен «ГВК-6» маркӑллӑ утă тавăракан çаклатса, малтанхи кунсенчех çулнă паккуссенчи типнӗ утта тавăрма пуçăннăччӗ. Унтан паккусенчи типӗтнӗ утта механизаторсем рулонсем туса хурӗҫ, ӑна выльӑх апачӗ картине кӳрӗç.

Обществăн директорӗ Барис Гафуров каланӑ тӑрӑх, выльӑх-чӗрлӗх ӗрчетес ӗҫ тупӑш кӳтӗр тесен, выльӑх-чӗрлӗх умӗнче талӑкӗпех пахалӑхлӑ апат пулмалла. Ертӳҫӗ каланӑ тӑрӑх, «Цильна» хуҫалӑхра выльӑх-чӗрлӗхе хӗл каçарма  сахалтан та 20 пин тонна силос, 20 пин тонна сенаж тата 1,5-2 пин тонна утӑ хатӗрлемелле. Обществӑра паянхи кун 1,5-2 ҫул валли ҫителӗклӗ апат запасӗ пур.

Справка

Районти выльӑх-чӗрлӗхе ӑнӑҫлӑн хӗл каҫармашкăн кашни выльӑх пуҫне вӑтамран 38 центнер апат запасӗ хатӗрлемелле.

«Ҫӗпрел Рассвет Агро» общество сенаж хывма пуçăнчӗ. Районти ял хуҫалӑхӗпе апат-ҫимӗҫ управленийӗнчен июнӗн 6-мӗшӗ тӗлне илнӗ даннăйсенчен курăннă тăрăх, «Ҫӗпрел Рассвет Агро» обществăра лайӑх пахалӑхлӑ 3916 тонна сенаж хывнӑ.